ఎన్నికల వేళ సీఎం సన్నిహితులపై ఐటీ దాడులు

ఎన్నికల వేళ మధ్యప్రదేశ్ సీఎం మాజీ ప్రత్యేక అధికారి, సలహాదారు ఇళ్లపై ఆదాయ పన్ను అధికారులు దాడులు చేశారు. భోపాల్​లో భారీగా నగదు పట్టుకున్నట్లు సమాచారం. మొత్తం 50 ప్రదేశాల్లో 300 మంది అధికారులు తనిఖీలు చేస్తున్నారు.

మధ్యప్రదేశ్ ముఖ్యమంత్రి కమల్​నాథ్​ సన్నిహితులపై ఐటీ శాఖ దాడులు నిర్వహిస్తోంది. పన్ను ఎగవేత ఆరోపణల కారణంగా దిల్లీ, మధ్యప్రదేశ్​లలో కమల్​నాథ్​ సంబంధీకుల ఇళ్లలో సోదాలు చేస్తున్నట్లు అధికారులు తెలిపారు.

ఇండోర్​, భోపాల్, దిల్లీలో తనిఖీలు చేశారు ఆదాయపన్ను అధికారులు. మొత్తం 50 ప్రదేశాల్లో 300 మంది సిబ్బంది దాడుల్లో పాల్గొన్నారు.

మధ్యప్రదేశ్ సీఎం కమల్​నాథ్​ మాజీ ప్రత్యేక అధికారి ప్రవీణ్​ కక్కర్, మాజీ సలహాదారు రాజేంద్ర మిగ్లానీ ఆయన బంధువు రతుల్​ పూరి సహా మరి కొంతమంది నివాసాలపైనా ఐటీ శాఖ దాడులు చేసింది. స్వాధీనం చేసుకున్న పత్రాలను అధికారులు పరిశీలిస్తున్నారు.

రతుల్ పూరిని గతవారం ఈడీ అగస్టా వెస్ట్​ల్యాండ్​ కేసులో విచారించింది.

లోక్​సభ ఎన్నికల ప్రకటన రాగానే కక్కర్​, మిగ్లానీ వారి ఉద్యోగాలకు రాజీనామా చేయడం గమనార్హం.

ఎవరీ ప్రవీణ్ కక్కర్..?

మధ్యప్రదేశ్​కు చెందిన మాజీ పోలీసు అధికారి ప్రవీణ్ కక్కర్. రాష్ట్రానికి ముఖ్యమంత్రిగా కమల్​నాథ్​ బాధ్యతలు స్వీకరించిన అనంతరం కక్కర్​ను ప్రత్యేక అధికారిగా నియమించారు. కేంద్ర మాజీ మంత్రి కాంతీలాల్​ భూరియా దగ్గర ఈయన ప్రత్యేక అధికారిగా ఉన్నారు. ఎంతోమంది వ్యాపారులతో కక్కర్​ కుటుంబానికి సంబంధాలున్నాయి.

మరోచోట...

కోల్​కతాకు చెందిన వ్యాపారి పరాస్​ మార్​ లోథా నివాసాలపైనా 200 మంది ఐటీ అధికారులు ఉదయం 3 గంటల ప్రాంతంలో దాడులు చేశారు. ఎన్నికల వేళ భారీగా హవాలా డబ్బు తరలిస్తున్నారనే సమాచారంతో ఈ సోదాలు చేశారు. సరైన ఆధారాలు లేని సొమ్మును స్వాధీనం చేసుకున్నారు.

• ఇవీ చూడండి: 'వారి​వి తప్పుడు హామీలు- ఇవిగో సాక్ష్యాలు'