ఎర్రకోటలో మోదీకి చేయూతగా నిలిచిన ఆ మహిళ ఎవరు?

స్వాతంత్ర్య దినోత్సవం రోజున ఎర్రకోటలో ప్రధాని నరేంద్ర మోదీ జాతీయ జెండాను ఎగురవేస్తున్నప్పుడు ఆయనకు సహాయంగా ఓ మహిళా అధికారి ఉన్నారు. ప్రస్తుతం ఆమె గురించే యావత్​ దేశం చర్చించుకుంటోంది. ఆమె ఎవరో కాదు మేజర్​ శ్వేతా పాండే. శిక్షణ సమయం నుంచే అద్బుత ప్రతిభతో అధికారుల దృష్టిని ఆకర్షించి.. ఫ్లాగ్​ ఆఫీసర్​గా ఎన్నికైన శ్వేతా పాండే గురించి మరిన్ని విశేషాలు...

మహిళలు అన్నింటా దూసుకెళుతున్నారనడానికి ఆమె ఓ ఉదాహరణ. పాఠశాల, కళాశాలలో టాపర్​గా నిలవటమే కాదు.. ఆర్మీ మేజర్​గానూ అందరి మన్ననలు పొందారు. భారత 74వ స్వాతంత్ర్య దినోత్సవం సందర్భంగా ఎర్రకోటలో ప్రధానమంత్రి నరేంద్ర మోదీ జెండా ఎగురవేసేందుకు సహాయాధికారిగా విధులు నిర్వర్తించి యావత్​ భారతావని చూపును ఆకర్షించారు. ఆమెనే మేజర్​ శ్వేతా పాండే.

ప్రధాని మోదీ ఎర్రకోటలో జెండా ఎగురవేస్తున్నప్పుడు ఆయన పక్కనే ఉన్నారు మేజర్​ శ్వేతా పాండే. జెండా ఆవిష్కరణ సమయంలో ప్రధానికి సహాయంగా ఉండేందుకు రక్షణ శాఖ కొద్ది రోజుల ముందే ఆమెను స్వాతంత్ర్య దినోత్సవ ఫ్లాగ్​ ఆఫీసర్​గా ఎంపిక చేసింది.

సైన్యంలోని 505 బేస్​ వర్క్​షాప్​ సైనిక అధికారిగా విధులు నిర్వర్తిస్తున్నారు శ్వేతా పాండే. ఆయుధాలు, యుద్ధ వాహనాలు, ఇతర ఆయుధ సంపత్తికి అవసరమైన మరమ్మతులు చేసే పనులను పర్యవేక్షిస్తుంటారు. ఆ విభాగంలో ఈఎంఈ (ఎలక్ట్రానిక్స్​ అండ్​ మెకానికల్​ ఇంజనీర్స్​) ఆఫీసర్​ ఆమె. ఈ ఏడాది జరిగిన రష్యా విక్టరీ డే, భారత స్వాతంత్ర్య దినోత్సవం దళాధిపతిగా శ్వేతకు అవకాశం లభించింది.

మేజర్​ శ్వేతా పాండే

2012లో సైన్యంలోకి...

శ్వేతా పాండే 2012 మార్చిలో సైన్యంలో చేరారు. చెన్నైలోని ఆఫీసర్​ ట్రైనింగ్​ అకాడమీలో శిక్షణ తీసుకుంటున్నప్పుడే ఆమె చురుకుదనాన్ని గమనించారు అధికారులు. ఆమె రక్షణ వ్యూహాలతో అకాడమీ టాపర్​గా నిలిచారు. గర్వాల్​ రైఫిల్స్​ మెడల్​ సాధించారు శ్వేత. పాఠశాల, కళాశాల స్థాయిలోనే వివిధ జాతీయ, అంతర్జాతీయ కార్యక్రమాల్లో 75 మెడల్స్, 250 ప్రశంసా పత్రాలు సాధించారు.

మేజర్​ శ్వేతా పాండే తండ్రి రాజ్​ రతన్​ పాండే .. ఉత్తర్​ప్రదేశ్​ ప్రభుత్వంలో ఆర్థిక శాఖ అదనపు డైరెక్టర్​గా విధులు నిర్వర్తించారు. ఆమె తల్లి అమితా పాండే సంస్కృతం, హిందీ ప్రొఫెసర్​.

ఇదీ చూడండి:ఆరేళ్ల టీచర్ ఆన్​లైన్​ పాఠాలు సూపర్