సోరెన్​ ప్రమాణం వేళ విపక్షాల 'ఐకమత్య' రాగం

ఝార్ఖండ్​ సీఎంగా హేమంత్​ సోరెన్​ ప్రమాణస్వీకార మహోత్సవంలో విపక్ష నేతలంతా కలిసి ఐక్యమత్యాన్ని ప్రదర్శించారు. పౌరచట్టంపై నిరసనల నేపథ్యంలో భాజపాయేతర పార్టీల బలాన్ని వేదికపై ప్రదర్శించారు.

ఝార్ఖండ్​లో విపక్షాలు ఏకమై తమ ఐకమత్యాన్ని చాటిచెప్పాయి. రాష్ట్ర ముఖ్యమంత్రిగా జేఎంఎం కార్యనిర్వాహక అధ్యక్షుడు హేమంత్​ సోరెన్​ ప్రమాణస్వీకారం చేసిన తరుణంలో కాంగ్రెస్​ నేత రాహుల్​ గాంధీ, బంగాల్​ ముఖ్యమంత్రి మమతా బెనర్జీ సహా భాజపాయేతర నేతలు తరలివెళ్లి తమ మద్దతును ప్రకటించారు. పౌరసత్వ చట్టంపై దేశవ్యాప్తంగా నిరసనలు వ్యక్తమవుతోన్న నేపథ్యంలో విపక్షాల ఐకమత్యానికి ప్రాధాన్యం ఏర్పడింది.

11వ ముఖ్యమంత్రిగా...

రాంచీలోని మోరాబది మైదానంలో ఝార్ఖండ్​ 11వ ముఖ్యమంత్రిగా హేమంత్​ సోరెన్​ బాధ్యతలు చేపట్టారు. రాష్ట్ర గవర్నర్​ ద్రౌపది ముర్ము ఆయనతో పదవీ ప్రమాణం చేయించారు. ఈ వేడుకలో సోరెన్​తో పాటు ముగ్గురు మంత్రులు కూడా ప్రమాణం చేశారు.

కాంగ్రెస్​ అగ్రనేత రాహుల్​ గాంధీ, బంగాల్​ ముఖ్యమంత్రి మమతా బెనర్జీ, దిల్లీ ముఖ్యమంత్రి అరవింద్ కేజ్రీవాల్​, డీఎంకే అధినేత స్టాలిన్, సీపీఎం, సీపీఐ నేతలు సీతారాం ఏచూరీ, డి. రాజా, రాజస్థాన్ ముఖ్యమంత్రి అశోక్ గహ్లోత్ సహా పలువురు అగ్రనేతలు హాజరయ్యారు.

ఝార్ఖండ్​లో నెలకొన్న సంకీర్ణ ప్రభుత్వం అన్ని వర్గాల సంక్షేమం, ప్రజాభివృద్ధి, శాంతికి నిరంతర కృషి చేస్తుందని రాహుల్​ గాంధీ విశ్వాసం వ్యక్తం చేశారు.

ప్రధాని శుభాకాంక్షలు

ఝార్ఖండ్​ ముఖ్యమంత్రిగా ప్రమాణస్వీకారం చేసిన హేమంత్​ సోరెన్​కు ట్విట్టర్​ వేదికగా శుభాకాంక్షలు తెలిపారు ప్రధాని నరేంద్ర మోదీ.

"ఝార్ఖండ్​ ముఖ్యమంత్రిగా బాధ్యతలు చేపట్టిన హేమంత్​ సోరెన్​కు శుభాకాంక్షలు. రాష్ట్రాభివృద్ధికి కేంద్రం నుంచి సహాయసాకారాలు అందిస్తామని భరోసా ఇస్తున్నాను."

-నరేంద్ర మోదీ, ప్రధాన మంత్రి​

ఘన విజయంతో..

81 స్థానాలు ఉన్న ఝార్ఖండ్​ అసెంబ్లీ ఎన్నికల్లో జేఎంఎం-కాంగ్రెస్​-ఆర్​జేడీ కూటమి ఘన విజయం సాధించింది. మొత్తం 47 (జేఎంఎం-30, కాంగ్రెస్​-16, ఆర్​జేడీ-1) స్థానాల్లో గెలుపొంది సాధారణ మెజార్టీ కన్నా 5 సీట్లు ఎక్కువ సాధించింది. ఈ నేపథ్యంలో ఝార్ఖండ్ వికాస్ మోర్చాకు చెందిన ముగ్గురు శాసనసభ్యులు, ఒక సీపీఎం సభ్యుడు జేఎంఎం కూటమికి మద్దతు ప్రకటించారు. ఈ ఎన్నికల్లో అధికార భాజపా పార్టీ 25 స్థానాలతో సరిపెట్టుకుని అధికారాన్ని కోల్పోయింది.

ఇదీ చూడండి : 'సోరెన్ అను నేను'-ఝార్ఖండ్​ 11వ సీఎంగా ప్రమాణం