కరోనా టెస్ట్ కిట్లను 2 రోజులు వాడొద్దు: కేంద్రం

కరోనాపై పోరుకు సంబంధించి కీలక ప్రకటన చేసింది ఆరోగ్య శాఖ. వైరస్​పై పోరాడుతున్న వారి సమాచారాన్ని వెబ్​పోర్టల్​లో ఉంచింది. రాపిడ్ టెస్టు కిట్ల కచ్చితత్వంపై అనుమానాల నేపథ్యంలో వాటిని 2 రోజుల పాటు వాడొద్దని రాష్ట్రాలకు సూచించింది కేంద్రం.

కరోనా వైరస్​పై పోరాడుతున్న అత్యవసర సేవల సిబ్బంది కోసం వెబ్​ పోర్టల్ ఏర్పాటు చేసినట్లు వెల్లడించింది ఆరోగ్య శాఖ. వైరస్​పై రోజువారీ ప్రకటనలో భాగంగా పలు కీలక అంశాలను ప్రకటించింది. ఈ మేరకు covidwarriors.gov.in లో వైరస్​పై పోరుకు సంబంధించిన సమాచారం అందుబాటులో ఉండనుంది. కంటెయిన్​మెంట్ జోన్లలో సేవలు అందించేందుకు సిద్ధంగా ఉన్న 1.24 కోట్లమంది నిపుణులు, వలంటీర్ల వివరాలు ఈ వెబ్​పోర్టల్​లో ఉంటాయి.

రెట్టింపు సమయంలో పెరుగుదల...

ఆరోగ్య శాఖ గణాంకాల ప్రకారం... కరోనా వ్యాప్తి రెట్టింపయ్యే రేటు పెరిగింది. దేశంలో కరోనా నయమయ్యే కేసు శాతం17.47 గా ఉంది. ఇప్పటివరకు 3,252 మంది వైరస్ నుంచి కోలుకున్నారు.

రాపిడ్​ కిట్లు వద్దు..

రాపిడ్ కిట్ల ద్వారా కచ్చితమైన ఫలితాలు రావడం లేదని అభ్యంతరాలు వచ్చాయి. ఈ నేపథ్యంలో కిట్ల విశ్వసనీయతపై విచారణ చేపడుతున్నట్లు తెలిపింది ఆరోగ్య శాఖ. రెండు రోజుల పాటు రాపిడ్ కిట్లు వినియోగించకూడదని సూచించింది.

ఒక్క కేసు లేదు..

ఆరోగ్య శాఖ లెక్కల ప్రకారం... 23 రాష్ట్రాలు, కేంద్రపాలిత ప్రాంతాల్లోని 61 జిల్లాల్లో 14 రోజులుగా ఒక్క కేసు నమోదు కాలేదు. ఈ జాబితాలో మహారాష్ట్రలోని లాతూర్, ఉస్మానాబాద్​, హింగోలీ, వాషిమ్ జిల్లాలు కొత్తగా చేరాయి.

ఇప్పటివరకు 4 లక్షల పరీక్షలు..

ఇప్పటివరకు 4,49,810 వైరస్ పరీక్షలను నిర్వహించారు. సోమవారం ఒక్కరోజులో 35,852 వైరస్ నిర్ధరణ పరీక్షలు జరిగాయి. 201 ఐసీఎంఆర్, 86 ప్రైవేటు ల్యాబ్​ల్లో కరోనా పరీక్షలను నిర్వహిస్తున్నారు.

ఇదీ చూడండి:'ఆ కరోనా రోగికి ప్లాస్మా థెరపీ విజయవంతం!'