దేశాన్ని నివ్వెరపరిచే విషాదకర ఘటన జరిగిన ఉత్తర్ప్రదేశ్ హాథ్రస్ జిల్లా బుల్గర్హి గ్రామంలో.. పోలీసుల పటిష్ఠ బందోబస్తు కొనసాగుతోంది. శాంతి భద్రతలను పరిరక్షించేందుకు గ్రామంలో భారీ స్థాయిలో పోలీసులను మోహరించారు. ఈ చిన్న గ్రామం ఇప్పుడు ఓ శత్రు దుర్భేధ్య కోటలా మారిపోయింది.
గ్రామంలోని ప్రతీ వీధిలో పోలీసులు దర్శనమిస్తున్నారు. అనుకోని ఘటనలు తలెత్తితే అడ్డుకొనేందుకు పోలీసులను రంగంలోకి దించారు. అలజడులను నియంత్రించేందుకు 60 మంది కానిస్టేబుళ్లను మోహరించినట్లు గ్రామంలోని ఓ అధికారి వెల్లడించారు.
రాత్రి సమయంలో గ్రామంలోకి రాకపోకలు నిషేధించారు. గ్రామానికి ఉన్న ప్రవేశ ద్వారాల వద్ద బ్యారికేడ్లు ఏర్పాటు చేశారు. రెండున్నర కిలోమీటర్ల దూరంలో ఉన్న పొలిమేర వద్ద గట్టి నిఘా ఉంచారు.