భారత్-చైనా సరిహద్దుల్లో నెలకొన్న ప్రతిష్టంభన అంశానికి సంబంధించి కేంద్రమంత్రులు, కాంగ్రెస్ నేత రాహుల్ గాంధీ మధ్య మాటల యుద్ధం కొనసాగుతోంది. ఈ క్రమంలో కాంగ్రెస్ పార్టీని ఉద్దేశించి కవితాత్మకంగా విమర్శలు చేసిన రక్షణ శాఖ మంత్రి రాజ్నాథ్ సింగ్‌కు రాహుల్ మంగళవారం సూటి ప్రశ్న వేశారు.
"చేతి గుర్తును ఉద్దేశించి రక్షణ శాఖ మంత్రి రాజ్నాథ్ సింగ్ కామెంట్ చేయడం పూర్తయిన తర్వాత.. లద్దాఖ్‌లో చైనా సైన్యం భారత భూభాగాన్ని ఆక్రమించిందా అనే ప్రశ్నకు సమాధానం చెప్పగలరా?"
- రాహుల్ గాంధీ, కాంగ్రెస్ అగ్రనేత
మాటల యుద్ధం..
ఉర్దూ కవిత్వంలోని ఒక వాక్యం తీసుకొని, సోమవారం రాజ్నాథ్ కాంగ్రెస్ మీద వ్యంగ్యంగా విమర్శలు చేశారు. ఈ మాటల యుద్ధం.. కేంద్ర హోం మంత్రి అమిత్ షా సరిహద్దు పరిస్థితిపై ఓ వర్చువల్ ర్యాలీలో మాట్లాడటంతో ప్రారంభమైంది.
"అమెరికా, ఇజ్రాయెల్ తర్వాత భారత్‌కే సరిహద్దులను రక్షించుకొనే సామర్థ్యం ఉంది" అని వ్యాఖ్యానించారు అమిత్ షా. దీనిపై రాహుల్ స్పందిస్తూ.. హృదయాన్ని సంతోషంగా ఉంచుకోడానికి, మంచి ఆలోచన అవసరం అంటూ విమర్శలు చేశారు.
హస్తం గుర్తుపై రాజ్నాథ్ కవిత్వంపై కాంగ్రెస్ అధికార ప్రతినిధి రణ్దీప్ సుర్జేవాలా కూడా విమర్శించారు. "పార్టీ చిహ్నాలను కించపరచటం, దేశాన్ని రక్షించటం ఒక్కటి కాదు. రాహుల్ గాంధీ అడిగిన ప్రశ్నకు రాజ్నాథ్ సమాధానం చెప్పగలరా?" అని ప్రశ్నించారు.
ఇదీ చూడండి:'సీడీఎస్'తో రాజ్నాథ్ భేటీ.. చైనా సరిహద్దుపై చర్చ
