శ్రీనగర్లో నిన్నరాత్రి భద్రతాబలగాలు జరిపిన ఎన్కౌంటర్లో ఇద్దరు ముష్కరులు హతమయ్యారు. వీరిలో ఒకడు ప్రముఖ వేర్పాటువాది కుమారుడు జునైద్ అష్రఫ్ ఖాన్ సెహ్రాయిగా పోలీసులు గుర్తించారు.
"నిన్న రాత్రి జరిగిన ఎన్కౌంటర్లో ఇద్దరు ఉగ్రవాదులు హతమయ్యారు. వీరిలో ఒకరు జునైద్... తెహ్రీక్- ఏ- హురియత్ సంస్థ ఛైర్మన్ మహ్మద్ అష్రఫ్ ఖాన్ కుమారుడు. మరొకరు పుల్వామాకు చెందిన తారిఖ్ అహ్మద్ షేక్. ఇతను మార్చిలో హిజ్బుల్ ముజాహిద్దీన్లో చేరాడు.
హిజ్బుల్కు డివిజనల్ కమాండర్గా జునైద్ ఉన్నాడు. మధ్య కశ్మీర్పై అతను పట్టు కోసం ప్రయత్నిస్తున్నాడు. చాలా క్రిమినల్ కేసులకు సంబంధించి జునైద్ కోసం వెతుకుతున్నాం."
- దిల్బాగ్ సింగ్, జమ్ము కశ్మీర్ డీజీపీ
ఇదే తొలిసారి..
జునైద్.. కశ్మీర్ విశ్వవిద్యాలయం నుంచి ఎంబీఏ పట్టా పొందాడు. 2018 మార్చి నుంచి కనబడటం లేదు. కొన్ని రోజుల తర్వాత ఏకే- 47తో అతను దిగిన ఫొటో సామాజిక మాధ్యమాల్లో వైరల్గా మారింది. ఇలా ఒక వేర్పాటువాది కుమారుడు ఉగ్రవాదం వైపు వెళ్లటం ఇదే తొలిసారి అని అధికారులు చెబుతున్నారు.
ఇద్దరికి గాయాలు..
నగరంలోని నవాక్దల్ ప్రాంతంలో ముష్కురులున్నారన్న పక్కా సమాచారంతో అక్కడ నిర్బంధ తనిఖీలు నిర్వహించారు భద్రతా సిబ్బంది. వీరిని చూసిన ఉగ్రవాదులు కాల్పులకు తెగబడ్డారు. ఇది ఎన్కౌంటర్కు దారి తీసింది.
ఉదయం 2 గంటల సమయంలో ఎన్కౌంటర్ ప్రారంభమైందని అధికారులు తెలిపారు. ఆపరేషన్లో ఓ సీఆర్ఫీఎఫ్ జవాను, ఓ పోలీస్కు గాయాలైనట్లు అధికారులు తెలిపారు. ముందు జాగ్రత్త చర్యగా ఆ ప్రాంతంలో ఇంటర్నెట్ సేవలు నిలిపివేసినట్లు పేర్కొన్నారు.
