కరోనా విలయం మొదలై దాదాపు పది నెలలు గడుస్తోంది. ప్రజలు వైరస్ ఇబ్బందులతో అవస్థలు పడుతుంటే.. ప్రభుత్వాలు, పరిశోధకులు కొవిడ్ను ఎదుర్కోవడానికి తీవ్రంగా ప్రయత్నిస్తున్నారు. అయితే ఇలాంటి సమయంలో వ్యక్తిగత పరిశుభ్రతకు ప్రాధాన్యం ఇచ్చేలా మరోసారి సూచనలు చేసింది ప్రపంచ ఆరోగ్య సంస్థ. భౌతిక దూరం, దగ్గినప్పుడు చేతులు అడ్డుపెట్టుకోవడం, మాస్కు ధరించడమే కాకుండా సబ్బుతో చేతులు కడుక్కోవడం వల్ల వైరస్ వ్యాప్తికి అడ్డుకట్ట వేయొచ్చని వెల్లడించింది. ఇవే వ్యాక్సిన్ వచ్చే వరకు ఉన్న ఉపయుక్తమైన, సులభమైన మార్గాలుగా అభివర్ణించింది. ప్రస్తుతం ఈ విధానంతోనే ప్రాణాలు రక్షించుకోగలమని అభిప్రాయపడింది డబ్ల్యూహెచ్ఓ
అక్టోబర్ 15న 'గ్లోబల్ హ్యాండ్ వాషింగ్ డే' సందర్భంగా ఈ సూచనలు చేసింది డబ్ల్యూహెచ్ఓ. ప్రతి ఏటా ఈ రోజున శుభ్రతపై అవగాహన కల్పిస్తుంది.
"చేతులు కడుక్కోవడం వ్యాధులను అరికట్టడానికి ఉన్న అత్యంత ప్రభావవంతమైన మార్గాలలో ఒకటి. మనల్ని ఆరోగ్యంగా, సురక్షితంగా ఉంచడానికి ఈ విధానం ఉపయోగపడుతుంది. కరోనా నివారణలో చేతుల కడుక్కోవడం చాలా ముఖ్యం. కొవిడ్ దెబ్బతో ప్రజల జీవన అలవాట్లలో మార్పులు వచ్చాయి. ప్రతి ఒక్కరి జీవితంలో శుభ్రత భాగమైంది. ఈ కరోనా కాలంలో శుభ్రతను పాటిస్తేనే వ్యాధి నుంచి రక్షించుకోగలం."
--డా.పూనమ్ ఖేత్రపాల్ సింగ్, డబ్ల్యూహెచ్ఓ ఆగ్నేయ ప్రాంత డైరెక్టర్
బాధితుడి దగ్గు, తుమ్ము ద్వారా వచ్చే తుంపర్లు, నోటి స్రవాలు, ఆ వ్యక్తి ముట్టుకున్న ఉపరితలాన్ని ముట్టుకోవడం వల్ల కరోనా వ్యాప్తి జరుగుతోందని ప్రపంచ ఆరోగ్య సంస్థ హెచ్చరించింది. కాబట్టి చేతులను సబ్బుతో కడుక్కోవడం, ముక్కును తాకకుండా ఉండటం వంటివి చేయటం ముఖ్యమని తెలిపింది. అందుకే ఏ వస్తువులను పట్టుకున్నా శానిటైజర్ రాసుకోవాలని లేదంటే శుభ్రంగా చేతులు కడుక్కోవాలని సూచించింది.
