వారం పాటు స్వీయ నిర్బంధంలోనే సీఎం

వారం రోజుల పాటు స్వీయ నిర్బంధంలో ఉండాలని నిర్ణయించుకున్నారు గుజరాత్​ ముఖ్యమంత్రి విజయ్​ రూపానీ. మంగళవారం రుపానీని కలిసిన కాంగ్రెస్​ ఎమ్మెల్యేల్లో ఒకరికి వైరస్​ ఉందని తేలడమే ఇందుకు కారణం.

గుజరాత్​ ముఖ్యమంత్రి విజయ్​ రూపానీ.. వారం రోజుల పాటు స్వీయ నిర్బంధంలో ఉండాలని నిశ్చయించుకున్నారు. మంగళవారం తనను కలిసిన కాంగ్రెస్​ ఎమ్మెల్యేల్లో ఒకరికి వైరస్​ సోకినట్టు నిర్ధరణ అవడం వల్లే ఈ నిర్ణయం తీసుకున్నారు.

గుజరాత్​ ముఖ్యమంత్రికి కరోనా లక్షణాలు లేనట్లు వైద్యులు ధ్రువీకరించారు. ఈ విషయాన్ని ముఖ్యమంత్రి కార్యాలయం ముఖ్య కార్యదర్శి అశ్వినీ కుమార్​ వెల్లడించారు. వారం రోజులపాటు ఎవరినీ ముఖ్యమంత్రి నివాసానికి అనుమతించమని తెలిపారు. రుపానీ మాత్రం వీడియో కాన్ఫరెన్స్​, ఫోన్ల ద్వారా అందుబాటులోనే ఉంటారని స్పష్టం చేశారు.

ముఖ్యమంత్రి విజయ్​ రూపానీ.. కాంగ్రెస్​ ఎమ్మెల్యేలతో మంగళవారం సమావేశమయ్యారు. సమీక్షలో పాల్గొన్న ఎమ్మెల్యే ఇమ్రాన్​ ఖేదవాలాకు కరోనా సోకగా రాష్ట్ర యంత్రాంగం అప్రమత్తమైంది. ఈ నేపథ్యంలోనే సీఎంకు కరోనా పరీక్షలు నిర్వహించారు వైద్యులు.

ఇదీ చూడండి:-ఆ కరోనా మృతులంతా భోపాల్ దుర్ఘటన బాధితులే