అమెరికా అధ్యక్షుడు డొనాల్డ్ ట్రంప్ రాక కోసం యావత్ భారతదేశం ఎదురుచూస్తోంది. ముఖ్యంగా ప్రధానమంత్రి నరేంద్ర మోదీ సొంత రాష్ట్రం గుజరాత్.. ఈ నెల 24న జరగబోయే కార్యక్రమాల కోసం శరవేగంగా ముస్తాబవుతోంది. తాజాగా ట్రంప్ పాల్గొనే కార్యక్రమాలపై అహ్మదాబాద్ మున్సిపల్ కార్పొరేషన్(ఏఎమ్సీ).. 'నమస్తే ట్రంప్' పోస్టర్లతో పలు వివరాలను ట్వీట్ చేసింది.
పాన్-ఇండియా ఇమేజ్ కోసం...
24వ తేదీన సబర్మతి ఆశ్రమాన్ని సందర్శించిన అనంతరం.. ప్రధాని మోదీతో కలిసి చారిత్రక రోడ్షోలో పాల్గొంటారు ట్రంప్. ఈ రోడ్ షో 22 కిలోమీటర్లు సాగనుంది. ఆ తర్వాత ఇరు నేతలు మొతేరాలోని ప్రపంచంలోనే అతిపెద్ద క్రికెట్ స్టేడియాన్ని ఆవిష్కరించనున్నారు. అక్కడే జరగనున్న భారీ బహిరంగ సభలో అగ్రనేతలు ప్రసంగించనున్నారు. ఈ సభలో దాదాపు లక్షమంది ప్రజలు పాల్గొంటారని అధికారులు అంచనావేస్తున్నారు.
తొలుత ఈ కార్యక్రమానికి.. గుజరాతీ భాషలో 'కెమ్ చ్ఛో ట్రంప్' అనే పేరు పెడతారని ఊహాగానాలు వ్యక్తమయ్యాయి. కానీ ఈ వేడుకకు పాన్-ఇండియా ఇమేజ్ తీసుకురావడం కోసం 'నమస్తే ట్రంప్'ను ఖరారు చేసినట్టు తెలుస్తోంది. గతేడాది సెప్టెంబర్లో ప్రధాని మోదీ అమెరికా పర్యటన సందర్భంగా జరిగిన 'హౌడీ మోదీ' కార్యక్రమాన్ని ఇది గుర్తుచేస్తోంది.