ప్రతిష్ఠాత్మక రామ మందిర శంకుస్థాపన కార్యక్రమానికి హాజరయ్యే అతిథుల సంఖ్యలో మరికొంత కోత పడింది. ఈ నెల 5న జరగబోతున్న కార్యక్రమానికి తొలుత 208 మందిని అతిథులుగా ఆహ్వానించాలని ప్రతిపాదించారు. కరోనా వైరస్ తీవ్రత ఎక్కువగా ఉన్న నేపథ్యంలో దీన్ని 170-180కి పరిమితం చేయాలని తాజాగా నిర్ణయించారు. ప్రధాని నరేంద్రమోదీ చేతుల మీదుగా జరగబోయే భూమి పూజకు ఆరెస్సెస్‌ అధిపతి మోహన్‌ భాగవత్‌, రామజన్మభూమి న్యాస్‌ అధిపతి నృత్యగోపాల్‌ దాస్‌, సంఘ్‌ నేతలు భయ్యాజీ జోషి, దత్తాత్రేయ హోసబలే, విశ్వహిందూ పరిషత్‌ కార్యాధ్యక్షుడు అలోక్‌ కుమార్‌ తదితరులతో పాటు దాదాపు 50 మంది ఆధ్యాత్మికవేత్తలు హాజరు కానున్నారు. పార్టీ సీనియర్ నేతలు ఎల్‌కే ఆడ్వాణీ, మురళీ మనోహర్‌జోషిలు వీడియో కాన్ఫరెన్స్ ద్వారా ఈ కార్యక్రమంలో పాల్గొనే అవకాశం ఉంది. ఆర్ట్‌ ఆఫ్‌ లివింగ్‌ వ్యవస్థాపకులు శ్రీశ్రీ రవిశంకర్‌, ఆధ్యాత్మిక వేత్త మురారీ బాపు వంటివారి పేర్లు ఆహ్వానితుల జాబితాలో లేవు. ఆలయం కోసం ఇప్పటి వరకు రూ.18.6 కోట్లు విరాళాలుగా వచ్చాయని, వాటిని ట్రస్టు ఖాతాకు బదలాయిస్తామని మురారీ ఇటీవల ప్రకటించారు.
వేదికపై ఐదుగురే
కాశీకి చెందిన జితేంద్ర సరస్వతి, మరో ముగ్గురు వేద పండితులు కలిసి రామాలయ భూమి పూజ క్రతువు నిర్వహిస్తారు. వేదికపై ప్రధాని మోదీతో పాటు (మోహన్‌ భాగవత్‌, నృత్యగోపాల్‌ దాస్‌, యూపీ గవర్నర్‌ ఆనందీబెన్‌ పటేల్‌, యూపీ ముఖ్యమంత్రి యోగి ఆదిత్యనాథ్‌ మాత్రమే ఉంటారు. కరోనా తీవ్రత దృష్ట్యా శంకుస్థాపన వేడుకకు తరలి రావద్దంటూ అనుచరులకు, భక్తులకు ట్రస్టు నిర్వాహకులు విజ్ఞప్తి చేస్తున్నారు. అయినా ఉత్సాహంతో ఎక్కువ మంది తరలివస్తే వైరస్ మరింత ప్రబలే అవకాశం ఉంటుందని భయపడుతున్నారు.