'3000టన్నులు కాదు 160కిలోల బంగారమే ఉంది'

ఉత్తర్​ప్రదేశ్​లో 3000 టన్నుల బంగారు నిల్వలు ఉన్నాయని జరుగుతున్న ప్రచారాన్ని జియోలాజికల్ సర్వే ఆఫ్​ ఇండియా ఖండించింది. అక్కడ 52వేల 800 టన్నుల ముడి ఖనిజం ఉందని వివరణ ఇచ్చింది. దీని ద్వారా 160కిలోల బంగారం మాత్రమే వస్తుందని స్పష్టం చేసింది.

ఉత్తర్​ప్రదేశ్ సోన్​భద్రా జిల్లాలో 3,000 టన్నుల బంగారు నిక్షేపాలు ఉన్నాయనే వార్త నిజం కాదని జియోలాజికల్ సర్వే ఆఫ్ ఇండియా(జీఎస్​ఐ) ప్రకటించింది. తాము అలాంటి సమాచారం ఇవ్వలేదని పేర్కొంది. సోన్​భద్రా జిల్లాలో భారీ మొత్తంలో బంగారు నిల్వలు ఉన్నట్లు నిర్ధరణ కాలేదని తెలిపింది.

బంగారు నిల్వల కోసం తాము జరిపిన సర్వే అంత సంతృప్తికరంగా లేదని జీఎస్​ఐ డైరెక్టర్​ శ్రీధర్​ చెప్పారు. ఆ ప్రాంతంలో 52వేల 8వందల టన్నుల ముడిఖనిజం ఉందని.. అయితే దాని నుంచి ప్రతీ టన్నుకు 3.03 గ్రాముల బంగారం వెలువడుతుందన్నారు. మొత్తంగా అక్కడున్న ఖనిజం నుంచి 160కిలోల బంగారం మాత్రమే వస్తుందన్నారు. మీడియాలో పేర్కొన్నట్లు 3000 టన్నులు కాదని వివరణ ఇచ్చారు.