మళ్లీ మారనున్న భారత్​ మ్యాప్​- లోక్​సభకు కీలక బిల్లు

ఇప్పటివరకూ రెండు కేంద్రపాలిత ప్రాంతాలుగా ఉన్న దమణ్ ​దీవ్​, దాద్రానగర్‌ హవేలీని విలీనం చేసి ఒకటే యూటీగా మార్చేందుకు కేంద్రం సిద్ధమైంది. ఇందుకు సంబంధించిన దాద్రానగర్‌ హవేలీ, దమణ్​దీవ్ (కేంద్రపాలిత ప్రాంతాల విలీనం) బిల్లు 2019ని లోక్​సభలో ప్రవేశపెట్టింది.

రెండు కేంద్రపాలిత ప్రాంతాలుగా ఉన్న దమణ్​ దీవ్​, దాద్రానగర్‌ హవేలీని పరిపాలనా సౌలభ్యం తదితర కారణాలతో విలీనం చేసేందుకు కేంద్ర ప్రభుత్వం సమాయత్తమైంది. రెండింటిని ఒకటే యూటీగా మార్చే దాద్రానగర్‌ హవేలీ, దమణ్​దీవ్ (కేంద్రపాలిత ప్రాంతాల విలీనం) బిల్లు 2019ని కేంద్ర హోంశాఖ సహాయమంత్రి జి. కిషన్​ రెడ్డి ఇవాళ లోక్​సభలో ప్రవేశపెట్టారు.

దమణ్​ దీవ్​, దాద్రానగర్‌ హవేలీ కేంద్రపాలిత ప్రాంతాలు కేవలం 35 కి.మీ. దూరంలో ఉన్నప్పటికీ ఇరు ప్రాంతాలకు వేర్వేరు సచివాలయాలు ఉన్నాయి. దాద్రానగర్‌ హవేలీలో ఒక జిల్లా ఉండగా... దమణ్​ దీవ్​లో రెండు జిల్లాలు ఉన్నాయి.

కొత్తగా ఏర్పడే యూటీకి దాద్రా, నగర్‌ హవేలీ, దమణ్​ దీవ్​ అనే పేరు పరిశీలనలో ఉంది. నూతన యూటీ ప్రధాన కేంద్రంగా దమణ్​ దీవ్​ ఉండే అవకాశముంది.

జమ్ముకశ్మీర్‌కు ప్రత్యేక ప్రతిపత్తి కల్పించే ఆర్టికల్‌ 370ని కేంద్ర ప్రభుత్వం ఆగస్టు 5న రద్దు చేసి... రెండు కేంద్రపాలిత ప్రాంతాలుగా విభజించింది. ఈ కారణంగా దేశంలో ప్రస్తుతం 9 యూటీలు ఉన్నాయి. అయితే దమణ్ ​దీవ్​, దాద్రానగర్‌ హవేలీ విలీనంతో దేశంలో కేంద్రపాలిత ప్రాంతాల సంఖ్య ఎనిమిదికి తగ్గనుంది.

• ఇదీ చూడండి: భారత దేశ ప్రజలమైన మేము...