'పెద్దలకు రుణాలు కాదు..పేదలకు డబ్బులివ్వండి'

దేశ ఆర్థిక వ్యవస్థను పునరుద్ధరించేందుకు పేదలందరికీ నేరుగా డబ్బులు ఇవ్వాల్సిన అవసరముందని కాంగ్రెస్ నేత రాహుల్​ గాంధీ అన్నారు. వినియోగం ద్వారానే ఆర్థికవ్యవస్థను గాడిలో పెట్టవచ్చని పునరుద్ఘాటించారు. వైఫల్యాలను కప్పిపుచ్చుకోలేరని ప్రధాని మోదీ ప్రభుత్వంపై ట్విట్టర్​ వేదికగా విమర్శలు గుప్పించారు.

ప్రధాని నరేంద్రమోదీ ప్రభుత్వంపై మరోమారు విమర్శలతో విరుచుకుపడ్డారు కాంగ్రెస్ అగ్రనేత రాహుల్ గాంధీ. సంక్షోభంతో కొట్టుమిట్టాడుతున్న ఆర్థిక వ్యవస్థను పునరుద్ధరించాలంటే దేశంలోని పేదలందరకీ నేరుగా నగదు సాయం అందించాల్సిన అవసరం ఉందని పునరుద్ఘాటించారు. వినియోగం ద్వారా మాత్రమే ఆర్థిక వ్యవస్థను గాడిలో పెట్టవచ్చని సూచించారు.

కరోనా సంక్షోభం నుంచి బయటపడి ఆర్థిక వ్యవస్థ తిరిగి పుంజుకోవాలంటే భారీ సంస్కరణలు అవసరమని, ప్రభుత్వ వినియోగమే కీలకమని ఆర్బీఐ తెలిపిన మరునాడే ట్వీట్​ చేశారు రాహుల్​.

" కొద్ది నెలలుగా నేను హెచ్చరిస్తున్న విషయాన్నే ఆర్బీఐ ఇప్పుడు ధ్రువీకరించింది. ఎక్కువ రుణాలు ఇవ్వడం కాదు.. ఎక్కువ ఖర్చు చేయాలి . పారిశ్రామిక వేత్తలకు పన్నులు తగ్గించడం కాదు.. పేదలకు డబ్బులివ్వండి. మీడియా ద్వారా ప్రజల దృష్టిని మళ్లించినంత మాత్రాన ఆర్థిక వైఫల్యాలను కనపడకుండా చేయలేరు. "

-రాహుల్​ గాంధీ ట్వీట్​.

ఇదీ చూడండి: 'భారీ సంస్కరణలతోనే ఆర్థిక రికవరీ సాధ్యం'