కుమారుడి ప్రాణాల కోసం మరో బిడ్డకు జన్మ

కుమారుడి ప్రాణాలను కాపాడుకునేందుకు మరో బిడ్డకు జన్మనిచ్చింది ఓ మహిళ. తలసేమియాతో బాధపడుతున్న ఆమె కుమారుడి మూలకణాల మార్పిడికి సరిపోయే ఎముక మజ్జ కోసం ఐవీఎఫ్​ ద్వారా బిడ్డను కన్నది. ఏడాది దాటిన తర్వాత బాలిక ఎముక మజ్జ మార్పిడి చేసి కుమారుడి ప్రాణాలను కాపాడటంలో విజయవంతమయ్యారు.

తలసేమియాతో బాధపడుతున్న కుమారుని ప్రాణం కాపాడేందుకు ఓ బిడ్డకు జన్మనిచ్చారు అతని తల్లిదండ్రులు. ఎముక మజ్జను దానం చేసేందుకు ఇన్​-విట్రో ఫెర్టిలైజేషన్​ (ఐవీఎఫ్​) పద్ధతి ద్వారా జన్మనిచ్చి కుమారుడి ప్రాణం కాపాడటంలో విజయవంతమయ్యారు.

గుజరాత్​లోని అహ్మదాబాద్​కు చెందిన సహదేవ్​ సింగ్ సోలంకి, అల్పా సోలంకికి ఆరేళ్ల కుమారుడు అభిజిత్​ తీవ్రమైన తలసేమియాతో బాధపడుతున్నాడు. అతను బతకాలంటే ప్రతి నెల రక్తమార్పిడి చికిత్స చేయాల్సి ఉంటుంది. అలా చేసినా ఎంత కాలం జీవిస్తారో చెప్పలేని దుస్థితి. అయితే, ఎముక మజ్జ మార్పిడి చేయిస్తే పరిస్థితి మెరుగుపడవచ్చని చెప్పారు వైద్యులు.

మ్యాచ్ దొరకలేదు..

కానీ, అభిజిత్​కు సరిపోయే హ్యూమన్ ల్యూకోసైట్ యాంటిజెన్​ (హెచ్​ఎల్​ఏ) లభించలేదు. అతని కుటుంబ సభ్యుల్లో ఎవరితోనూ మ్యాచ్ కాలేదు. ఫలితంగా హెచ్​ఎల్​ఏ మ్యాచ్ అయ్యే ఎముక మజ్జ కోసం ఐవీఎఫ్ ద్వారా మరో బిడ్డను కనాలని వారికి సూచించారు. ఇలాంటి తీవ్రమైన వ్యాధులతో బాధేపడేవారికి మూలకణ మార్పిడికి ఈ పద్ధతి(సేవియర్​ సిబ్లింగ్​)ని వినియోగిస్తారు.

ఏడాది తర్వాత..

ఇలా ఐవీఎఫ్ ద్వారా అభిజిత్ తల్లి.. ఏడాది క్రితం కావ్యకు జన్మనిచ్చింది. కావ్య హెచ్​ఎల్​ఏ.. అభిజిత్​కు సరిపోయింది. కావ్య నిర్ణీత బరువు పెరిగే వరకు ఎదురుచూసిన వైద్యులు.. ఈ ఏడాది మార్చిలో విజయవంతంగా ఎముక మజ్జ మార్పిడి చేశారు. ఇప్పుడు అభిజిత్​కు ప్రమాదం తప్పిందని, ఇక ప్రతి నెల రక్తమార్పిడి అవసరం లేదని వైద్యులు తెలిపారు.

మూలకణాల మార్పిడి కోసం ఐవీఎఫ్ ద్వారా జన్మనిచ్చిన కేసు భారత్​లో ఇదే మొదటిది.

ఇదీ చూడండి:తస్మాత్​ జాగ్రత్త: పొగతాగేవారికి కరోనాతో అధిక ముప్పు