ఆంగ్ల నిఘంటువులో కొత్త పదం 'మోదీ లై': రాహుల్​

ప్రధానమంత్రి నరేంద్ర మోదీపై తీవ్ర విమర్శలు చేశారు రాహుల్​ గాంధీ. ఆంగ్ల నిఘంటువులో 'మోదీ లై' అనే కొత్త పదం చేరిందని వ్యంగ్యాస్త్రాలు సంధించారు. మోదీ లై పదానికి అర్థం తెలుపుతూ ఉండే మార్ఫ్​ చేసిన ఓ ఆంగ్ల నిఘంటువు ఫొటోను ట్విట్టర్​లో పంచుకున్నారు.

ప్రధానమంత్రి నరేంద్ర మోదీపై వ్యంగ్యాస్త్రాలు సంధించారు కాంగ్రెస్​ అధ్యక్షుడు రాహుల్​ గాంధీ. ఆంగ్ల నిఘంటువులో కొత్తగా 'మోదీ లై' అనే పదం చేరిందని ఎద్దేవా చేశారు. ఈ పదానికి అర్థం తెలుపుతూ ఉండే ఒక ఫొటోను ట్వీట్టర్​ ఖాతాలో పంచుకున్నారు రాహుల్​. మార్ఫ్​ చేసిన ఈ ఫొటోలో మోదీ లైకు 'నిత్యం అబద్ధాలు చెప్పడం' వంటి అర్థాలున్నాయి.

మన్మోహన్​ సలహా తీసుకోవాల్సింది..

పంజాబ్​లోని ఫరిద్కోట్​ జిల్లా బర్గారి నగరంలో నిర్వహించిన ఎన్నికల ప్రచారంలో పాల్గొన్న రాహుల్​... మోదీ హయాంలో ఆర్థిక వ్యవస్థ ధ్వంసమైందని ఆరోపించారు. మన్మోహన్​ సింగ్​, నరేంద్ర మోదీ పాలనల మధ్య ఎంతో వ్యత్యాసముందని అభిప్రాయపడ్డారు.

మన్మోహన్​ సింగ్​ సలహా తీసుకుని ఉంటే ఆర్థిక వ్యవస్థను చిన్నాభిన్నం చేసిన నోట్ల రద్దు, జీఎస్టీలను మోదీ అమలు చేసేవారుకాదని తెలిపారు.

" భారత​ ఆర్థిక వ్యవస్థకు నరేంద్ర మోదీ కలింగించిన నష్టాన్ని పూడ్చేందుకు న్యాయ్​ పథకాన్ని తీసుకొస్తున్నాం. మీ పంజాబ్​కు చెందిన మన్మోహన్​ సింగ్​ పార్లమెంట్​ సాక్షిగా నోట్ల రద్దుతో దేశం జీడీపీలో రెండు శాతం నష్టపోతుందని చెప్పారు."

-రాహుల్​ గాంధీ, కాంగ్రెస్​ అధ్యక్షుడు.

ఇదీ చూడండి: ఒడిశాలో 'ఫొని' నష్టం రూ.12వేల కోట్లు