లాక్​డౌన్ 2.0​ రూల్స్​లో మార్పు- ఇక ఈ పనులు చేయొచ్చు

లాక్​డౌన్​ను పొడిగిస్తూ ప్రధాని నరేంద్ర మోదీ చేసిన ప్రకటన అనంతరం కేంద్రం హోంశాఖ కొన్ని మార్గదర్శకాలను విడుదల చేసింది. అయితే వాటికి మరికొన్ని అంశాలను జోడిస్తూ నేడు ఉత్తర్వులు జారీ చేసింది.

మహమ్మారి కరోనా వ్యాప్తి నియంత్రణకు దేశంలో రెండోదశ లాక్​డౌన్​ ప్రకటించారు ప్రధాని మోదీ. అనంతరం కొన్నింటికి మినహాయింపులు ఇస్తూ మార్గదర్శకాలు జారీ చేసింది కేంద్ర హోంశాఖ. అయితే తాజాగా వాటిని సవరించి మరిన్నింటికి మినహాయింపు ఇచ్చినట్లు కేంద్ర హోంశాఖ కార్యదర్శి అజయ్​భల్లా వెల్లడించారు. ఈమేరకు అన్ని శాఖలు, విభాగాల అధికారులకు ఆదేశాలు జారీ చేశారు.

గ్రామీణ ప్రాంతాల్లో..

గ్రామీణ ప్రాంతాల్లో జరిగే నిర్మాణ పనులు, నీటి సరఫరా, పారిశుద్ధ్యం పనులు, విద్యుత్ లైన్లు, టెలిఫోన్ లైన్లు, ఆప్టిక్ ఫైబర్ లైన్ల ఏర్పాటుకు సంబంధించిన అన్ని కార్యకలాపాలకు అనుమతులు మంజూరు చేసింది కేంద్రం.

బ్యాంకింగేతర సంస్థలకు..

దేశవ్యాప్తంగా ఉన్న బ్యాంకింగేతర ఆర్థిక సంస్థలు, మైక్రో ఫైనాన్స్ సంస్థలకు, సహకార రుణ సంస్థలకు, తక్కువ సిబ్బందితో కార్యకలాపాలు సాగించే విత్త సంస్థలకు లాక్​డౌన్​ నుంచి మినహాయింపు ఇచ్చింది.

ఇవీ వ్యవసాయంలో భాగమే..

గిరిజన ప్రాంతాల్లో జరిగే కార్యకలాపాలకు మినహాయింపు ఇచ్చింది. అటవీ ఉత్పత్తుల సేకరణ, పంటల సాగు, కలప సేకరణ వంటివి వ్యవసాయ సంబంధిత కార్యకలాపాల్లో చేర్చింది కేంద్ర ప్రభుత్వం.

సుగంధ ద్రవ్యాలు సాగు..

కొబ్బరి, వెదురు, కోకో, సుగంధ ద్రవ్య దినుసుల సాగు, శుద్ధి చేయడం, ప్యాకేజి, మార్కెటింగ్, అమ్మకాలు వంటి కార్యకలాపాలకు కేంద్రం మినహాయింపు ఇచ్చింది.

ఇదీ చూడండి:ఈ కిట్​తో 2 గంటల్లోనే 30 మందికి కరోనా పరీక్ష