అసాధారణ ప్రతిభతో నాలుగేళ్లకే 'గూగుల్​ గర్ల్'​!

ఒడిశాకు చెందిన ఓ నాలుగేళ్ల అమ్మాయి.. అద్భుతమైన తెలివితేటలతో ఆకట్టుకుంటోంది. బడికెళ్లి అక్షరాలు నేర్చుకునే పసి వయసులోనే రాష్ట్రాలు-రాజధానులు, కవులు, శాస్త్రవేత్తల పేర్లను ఇట్టే చెప్పేస్తోంది. ఇలా అసాధారణ ప్రతిభా నైపుణ్యాలను కనబరుస్తూ.. స్థానిక 'గూగుల్​ గర్ల్'​గా పేరుగాంచిన ఆ చిన్నారిపై ప్రత్యేక కథనం..

నాలుగేళ్లు.. అంటే అప్పుడే పాఠశాలకు వెళ్లే వయసది. ముద్దు ముద్దు మాటలతో అక్షరాభ్యాసం చేసేందుకు ఆరంభ తరుణమది. ఈ వయసులోనే అద్భుత ప్రతిభతో అదరగొడుతోంది ఒడిశాకు చెందిన ఓ బాలిక. ఒడిశా బ్రహ్మాపుర్​కు చెందిన జిగ్యాన్స మోహంతి.. తన రాష్ట్రంలోని జిల్లా పేర్లు, దేశంలోని రాష్ట్రాలు- వాటి రాజధానులను చకచకా చెప్పేస్తోంది. కవులు-రచనలు, శాస్త్రవేత్తలు-ఆవిష్కరణలు, ప్రముఖ రాజకీయ నాయకుల పేర్లను ఏ మాత్రం తడబాటు లేకుండా అలవోకగా వల్లె వేస్తూ.. ఔరా అనిపిస్తోంది. ఇలా పసి వయసులోనే అపారమైన ప్రతిభ కనబరుస్తోన్న ఈ చిన్నారిని.. స్థానికులు 'గూగుల్​ గర్ల్'​గా పిలుస్తున్నారట.

అత్తయ్య సహకారంతో..

గంజాం జిల్లా కుకుడాహండీ ప్రాంతానికి చెందిన జితేంద్ర మోహంతి కుమార్తె జిగ్యాన్స.. నాట్యం నేర్చుకునేందుకు బ్రహ్మాపుర్​లోని అత్తయ్య విష్ణుప్రియ వద్ద ఉంటోంది. ఈ చిన్నారి తెలివితేటలను గమనించిన ఆమె.. జిగ్యాన్స జ్ఞానానికి మరింత పదును పెట్టేలా చేసింది.

జిగ్యాన్స అసాధారణ ప్రతిభా పాటవాలను సామాజిక మాధ్యమాల్లో పోస్ట్​ చేశారు విష్ణుప్రియ. ఆ చిన్నారి వీడియోలు వైరల్​గా మారి.. ఆమెకు 'గూగుల్​ గర్ల్​' అనే పేరును తెచ్చిపెట్టాయంటున్నారు.

ఇదీ చదవండి:'అగ్గిపెట్టెల సేకరణ'లో ఆ బాలిక ఛాంపియన్