కాశీలో మాజీ జవాను నామినేషన్​ తిరస్కరణ

వారణాసిలో ప్రధాని మోదీపై పోటీకి దిగిన బీఎస్​ఎఫ్​ మాజీ జవాను తేజ్​ బహదూర్​ యాదవ్​ నామినేషన్​ను ఎన్నికల సంఘం తిరస్కరించింది. ఆయన సమాజ్​వాదీ పార్టీ తరఫున నామపత్రాలు దాఖలు చేశారు. ఈ అంశంపై సుప్రీంకోర్టును ఆశ్రయిస్తానని చెప్పారు తేజ్​ బహదూర్​.

ఉత్తరప్రదేశ్​లోని వారణాసి లోక్​సభ స్థానానికి పోటీ చేసేందుకు సరిహద్దు రక్షణ దళం(బీఎస్​ఎఫ్​) మాజీ సైనికుడు తేజ్​బహదూర్​ యాదవ్​ వేసిన నామినేషన్​ను తిరస్కరించారు ఎన్నికల అధికారులు. వారణాసిలో సమాజ్​వాదీ పార్టీ తరఫున ప్రధాని మోదీపై పోటీకి దిగారు తేజ్​బహదూర్​​.

సుప్రీంకు వెళతాం..

" నిన్న సాయంత్రం 6.15 నిమిషాలకు ఆధారాలు సమర్పించాలని అడిగారు. నేను ధనవంతుడిని కాదు. హెలికాప్టర్​ తీసుకొని దిల్లీలోని ఎన్నికల సంఘానికి వెళ్లేందుకు, ఆధారాలను ఆగమేఘాలపైన తెచ్చేందుకు. అయినా ప్రయత్నించాం. పత్రాలు తెచ్చాం. ఆ తర్వాత కూడా నామినేషన్​ను తిరస్కరించారు. ఈ రోజు ఉదయం 11 గంటల ముందు ఆధారాలు తీసుకురాలేదని చెబుతున్నారు. నియంతృత్వంగా తిరస్కరించారు. ఎన్నికల అధికారులు తీవ్ర ఒత్తిడిలో ఉన్నారు." -- తేజ్​ బహదూర్​ యాదవ్, మాజీ జవాను

ఈ విషయంపై సుప్రీంకోర్టును ఆశ్రయిస్తామని తేజ్​ ప్రతాప్​ తరఫు న్యాయవాది చెప్పారు.

అందుకే తిరస్కరించాం

మాజీ జవాను తేజ్​ బహదూర్​​ నామినేషన్​ను తిరస్కరించినందుకు కారణాలను వెల్లడించారు వారణాసి జిల్లా కలెక్టర్​.

" తేజ్​ప్రతాప్​ ప్రభుత్వ ఉద్యోగం నుంచి తొలగింపునకు గురయ్యారు. తొలగింపునకు అవినీతి, దేశద్రోహం కారణం కాదని చెప్పేందుకు ఎన్నికల సంఘం నుంచి ఆయన ధ్రువీకరణ పత్రం తేవాల్సి ఉంది. ఆ పత్రాన్ని ఆయన ఈ ఉదయం 11 గంటల లోపు సమర్పించలేదు. అందుకే నామినేషన్​ను తిరస్కరించాం." -- వారణాసి జిల్లా కలెక్టర్​

సైనికుల సమస్యలపై గళం

సైనికులకు ఇచ్చే ఆహారం సరిగా లేదని వీడియో తీసి సామాజిక మాధ్యమాల్లో విడుదల చేసినందుకు 2017లో తేజ్​ బహదూర్​ ఉద్యోగం కోల్పోయారు.
సార్వత్రిక ఎన్నికల ఏడో దశలో వారణాసి లోక్​సభ స్థానానికి మే 19న పోలింగ్​ జరగనుంది.