ఎమ్మెల్యే హత్యలో ప్రమేయమున్న మావో హతం

ఛత్తీస్​గఢ్​లో నక్సలైట్లు, భద్రతా దళాల మధ్య ఎదురుకాల్పులు జరిగాయి. ఈ ఘటనలో ఒక కీలక నక్సలైట్​ హతమయ్యాడు. భాజపా ఎమ్మెల్యే భీమా మండావి, నలుగురు పోలీసుల హత్యలో ఇతనికి ప్రమేయమున్నట్లు గుర్తించారు.

ఛత్తీస్​గఢ్​ దంతెవాడ ఎమ్మెల్యే భీమా మండావి, నలుగురు పోలీసుల హత్యలో ప్రమేయమున్న ఓ మావోయిస్టును భద్రతా దళాలు హతమార్చాయి. సుక్మా జిల్లా తంగ్​పాల్​ పోలీస్​ స్టేషన్​ పరిధిలోని మిస్సీడబ్బా అటవీ ప్రాంతంలో శుక్రవారం నక్సలైట్లు, బలగాలకు మధ్య ఎన్​కౌంటర్​ జరిగింది. భద్రత దళాల కాల్పుల్లో హతమైన మావోపై రూ.5 లక్షల రివార్డ్​ ఉంది.

నక్సలైట్ల ఏరివేతకు జిల్లాలోని మిస్సీ డబ్బా అటవీ ప్రాంతంలో జిల్లా రిజర్వ్​ గార్డ్(డీఆర్​జీ) బలగాలు రెండు రోజులుగా తనిఖీలు ముమ్మరం చేశాయి. శుక్రవారం తనిఖీలు నిర్వహిస్తున్న క్రమంలో ఉదయం 10గంటల ప్రాంతంలో నక్సలైట్లు, బలగాలకు మధ్య ఎదురుకాల్పులు జరిగాయి.

ఘటనా స్థలంలో నక్సలైట్​ మృతదేహాన్ని స్వాధీనం చేసుకున్నారు. మృతుడు కాటేకల్యాన్​ ఏరియా మావోయిస్ట్​ కమిటీ సభ్యుడు హుర్రాగా గుర్తించారు. 303 తుపాకీని స్వాధీనం చేసుకున్నారు. ఘటనాస్థలంలో ఉన్న రక్తపు గుర్తుల ప్రకారం మరికొంత మంది మవోలు గాయపడినట్లు పోలీసులు అనుమానిస్తున్నారు.

ఏప్రిల్​ 9న దంతెవాడ జిల్లాలోని శ్యామ్​గిరి గ్రామంలో మందుపాతర పేల్చిన ఘటనలో భాజపా ఎమ్మెల్యే భీమా మండావి, నలుగురు పోలీసులు మరణించారు.

ఇదీ చూడండి: రైలెక్కుతూ జారిపడ్డ మహిళ- రక్షించిన జవాన్