'క్రికెట్​ థియరీ'తో నిర్మల, గోయల్​కు ప్రియాంక పంచ్​

ఆర్థిక మందగమనంపై కేంద్ర మంత్రులు నిర్మలా సీతారామన్, పీయూష్ గోయల్ వ్యాఖ్యలను తీవ్రంగా తప్పుబట్టారు కాంగ్రెస్​ ప్రధాన కార్యదర్శి ప్రియాంక గాంధీ. అసలు సమస్యను వదిలిపెట్టి, ఇతర అంశాలను నిందిస్తున్నారంటూ మండిపడ్డారు. క్రికెట్​లో క్యాచ్​ అందుకోవాలంటే బంతిపైనే దృష్టి ఉండాలి తప్ప ఓలా, ఉబర్​, గణితాన్ని నిందించరాదని ట్వీట్​ చేశారు.

ఆర్థిక వృద్ధి మందగమనం నేపథ్యంలో నరేంద్ర మోదీ ప్రభుత్వంపై క్రికెట్​ పదజాలంతో వ్యంగ్యాస్త్రాలు సంధించారు కాంగ్రెస్​ ప్రధాన కార్యదర్శి ప్రియాంక గాంధీ. కేంద్ర ఆర్థిక మంత్రి నిర్మలాసీతారామన్​, వాణిజ్య మంత్రి పీయూష్​ గోయల్​ వ్యాఖ్యలపై ట్విట్టర్​లో తనదైన శైలిలో స్పందించారు ప్రియాంక. క్రీడాస్ఫూర్తిని కలిగి ఉండాలంటూ.... ఓ మ్యాచ్​లో ఆటగాడు కష్టమైన క్యాచ్​ అందుకుంటున్న దృశ్యాలను పోస్ట్​ చేశారు ప్రియాంక.

" క్రికెట్​లో క్యాచ్​ అందుకోవాలంటే బంతిపైనే దృష్టి ఉంచుతూ క్రీడా స్ఫూర్తిని కలిగి ఉండాలి. లేకపోతే ఓలా, ఉబర్​, గణితాన్ని నిందించాల్సి వస్తుంది. ఆర్థిక వ్యవస్థ ప్రయోజనాల దృష్ట్యా ఈ విషయాన్ని చెబుతున్నా."

- ప్రియాంక గాంధీ, కాంగ్రెస్​ ప్రధాన కార్యదర్శి.

భారత్​ను 5 ట్రిలియన్​ డాలర్ల ఆర్థిక వ్యవస్థగా మార్చడాన్ని గణితశాస్త్ర కోణంలో చూడరాదని వాణిజ్య మంత్రి పీయూష్​ గోయల్ ఇటీవల వ్యాఖ్యానించారు. గురుత్వాకర్షణను కనుగొనేందుకు అల్బర్ట్​ ఐన్​స్టీన్​కు గణితం మేలు చేయలేదని చెప్పారు. ఇప్పటికే... పీయూష్​ గురుత్వాకర్షణ వ్యాఖ్యలపై నెటిజన్లు చురకలు అంటించారు. గురుత్వాకర్షణను కనుగొన్నది న్యూటన్​ అని గుర్తు చేశారు.

అంతకుముందు... ప్రజలు కార్లను కొనడానికి బదులు ఓలా, ఉబర్​లో వెళ్లేందుకు మొగ్గు చూపడమే వాహనరంగంలో సంక్షోభానికి కారణమని అన్నారు నిర్మల.

ఇదీ చూడండి:చెన్నైలో యువతిని బలిగొన్న పెళ్లి ఫ్లెక్సీ​