రాజకీయాల్లో పరీక్షించుకుంటున్న సినీప్రముఖులు సినీ నటులు రాజకీయాల్లోకి రావడం కొత్తేం కాదు. తెలుగులో అంతలా లేకున్నా.. బాలీవుడ్ తారలు అడపాదడపా ప్రత్యక్షంగానో, పరోక్షంగానో ఎన్నికల పండుగలో భాగమవుతుంటారు. సునీల్ దత్, వినోద్ఖన్నా, హేమమాలిని, జయప్రద లాంటి ప్రముఖులు రాజకీయాల్లో అదృష్టం పరీక్షించుకున్నవాళ్లే. సినీ రంగంలో మెప్పించిన నటులు సినిమా జీవితం అనంతరం ఒకానొక దశలో.. రాజకీయాలనే తదుపరి కెరీర్గా ఎంచుకుంటున్నారు. ఇదీ చూడండి:రాజకుటుంబీకుల మధ్య రసవత్తర పోరు
కొత్త నాయకులు...
తాజాగా ఈ జాబితాలోకి 'రంగీలా' తార, నిన్నటి తరం కథానాయిక ఊర్మిళా మాతోంద్కర్ ప్రవేశించారు. దిల్లీలో రాహుల్ గాంధీ సమక్షంలో కాంగ్రెస్లో చేరారు. ఉత్తర ముంబయి స్థానం నుంచి... ఈ సినీ నటి లోక్సభ ఎన్నికల బరిలో నిలిచారు.
"కాంగ్రెస్ సిద్ధాంతాలు నచ్చి పార్టీలో చేరుతున్నాను. అంతే కానీ... ఎన్నికల సమయం కాబట్టి ఈ నిర్ణయం తీసుకోలేదు."
-- ఊర్మిళా మాతోంద్కర్
సల్మాన్ ఖాన్, సంజయ్ దత్ ప్రధాన పార్టీల్లో చేరతారంటూ వార్తలొచ్చాయి. కానీ అవి వదంతులేనని కొట్టిపారేశారీ నటులు. ఇటీవల జయప్రద సమాజ్ వాదీ పార్టీను వీడి భాజపాలో చేరారు. ఈ సార్వత్రిక సమరంలో ఉత్తరప్రదేశ్లోని రాంపుర్ లోక్సభ స్థానం నుంచి బరిలోకి దిగుతున్నారు జయప్రద.
బిగ్ బీ అమితాబ్ బచ్చన్ 80వ దశకంలోనే రాజకీయాలపై దృష్టి కేంద్రీకరించారు. తన స్నేహతుడు, మాజీ ప్రధాని రాజీవ్ గాంధీ తరపున ప్రచారం చేశారు అమితాబ్. అనంతరం బోఫోర్స్ కుంభకోణంలో కాంగ్రెస్ ఆరోపణలు ఎదుర్కొంటున్న సమయంలో రాజకీయాలకు దూరమయ్యారు. కానీ.. అమితాబ్ సతీమణి జయాబచ్చన్ క్రియాశీల రాజకీయాల్లో విజయవంతమయ్యారు. జయ..సమాజ్ వాదీ తరపున రాజ్యసభకు ప్రాతినిధ్యం వహిస్తున్నారు.
ప్రముఖ హిందీ నటుడు రాజ్బబ్బర్ రాజకీయాల్లో నిలకడ కొనసాగిస్తున్నారు. ప్రస్తుతం ఉత్తర్ప్రదేశ్ కాంగ్రెస్ అధ్యక్షుడిగా కీలక బాధ్యతలు నిర్వర్తిస్తున్నారు. నటి హేమమాలిని రాజకీయ ప్రయాణంలో ఆచితూచి అడుగులేస్తున్నారు. 2014లో మథుర నుంచి ఎంపీగా ఎన్నికైన హేమ.. ఈ సారీ బరిలో ఉన్నారు.
ఈ సారి వీరి సినిమా రావట్లేదు...
మోదీ సన్నిహితులైన నటుడు పరేశ్ రావల్ 2014లో అహ్మదాబాద్ నుంచి ఎంపీగా గెలుపొందారు. మళ్లీ టికెట్ వస్తుందనుకున్నా... నిరాశే ఎదురైంది.
మొదట నుంచి భాజపాలో ఉన్న శతృఘ్న సిన్హా ఆ పార్టీని వీడారు. ఈ సారి పట్నా సాహిబ్ టికెట్ను భాజపా కేంద్రమంత్రి రవిశంకర్ ప్రసాద్కు ఇచ్చినందున కాంగ్రెస్లో చేరనున్నారీ షాట్ గన్.
రాజకీయ రంగస్థలంలో మెప్పించిన నటులు
సునీల్ దత్ ఎంపీగా గెలిచి మన్మోహన్ సింగ్ మంత్రివర్గంలో క్రీడా శాఖ మంత్రిగా బాధ్యతలు నిర్వర్తించారు. అలనాటి బాలీవుడ్ స్టార్ వినోద్ ఖన్నా నాలుగు సార్లు పార్లమెంటు సభ్యుడిగా గెలిచి కేంద్రమంత్రి అయ్యారు. ప్రముఖ దర్శకుడు ప్రకాశ్ ఝా, నటుడు మహేష్ మంజ్రేకర్, నటి కిరణ్ ఖేర్ రాజకీయాల్లో అడుగుపెట్టినవాళ్లే.
కాల్షీట్ల కోసం ఒకప్పుడు తీరిక లేకుండా గడిపిన నటులు ఇప్పుడు కాలి బాట పట్టి ప్రజల్ని ఓట్లు అడుగుతున్నారు. రొమాంటిక్ డైలాగ్లతో మెప్పించిన హీరోలు రోడ్ షోలు చేస్తున్నారు. అభినయంతో అభిమానుల్ని అలరించిన అగ్రతారలు.. అందరినీ ఆకర్షించి అదృష్టం పరీక్షించుకుంటున్నారు.
ఇవీ చూడండి:
'అన్నీ మాట్లాడతా... ఆ ఒక్కటి మినహా!'
భారత్ భేరి: రాజకీయం రంగులమయం
