ఫ్లిప్​కార్ట్ గిడ్డంగిలో లూఠీ- లక్షల నగదు చోరీ!

ఉత్తర్​ప్రదేశ్​లో సినిమా స్టైల్​లో ఓ చోరీ జరిగింది. 18 సెకన్లలోనే లక్షల నగదు లూఠీ అయింది. ఫ్లిప్​కార్ట్​కు చెందిన గిడ్డంగిలో ఈ దొంగతనం జరిగింది. ఘటనపై పోలీసులు దర్యాప్తు చేస్తున్నారు.

ఉత్తర్​ప్రదేశ్​ రాంపుర్​లోని ఫ్లిప్​కార్ట్ గిడ్డంగిలో లూఠీ జరిగింది. తుపాకులు పట్టుకొని వచ్చిన ఐదుగురు దుండగులు లక్షల నగదును దోచుకెళ్లారు. శనివారం రాత్రి 10 గంటలకు ఈ ఘటన జరిగింది.

గిడ్డంగిలోని ఉద్యోగులు నగదును లెక్కిస్తున్న సమయంలో దుండగులు లోపలికి చొరబడ్డారు. తుపాకులు చూపిస్తూ నగదు ఉన్న డబ్బాను అమాంతం ఎత్తుకెళ్లారు. ఈ తతంగం అంతా 18 సెకన్లలోనే జరిగిపోయింది. చోరీ మొత్తం సీసీటీవీ కెమెరాల్లో నమోదైంది.

ఈ ఘటనపై పోలీసులకు సమాచారమిచ్చినట్లు గిడ్డంగి ఇంఛార్జి అన్​మోల్ కశ్యప్ తెలిపారు. కేసు నమోదు చేసుకున్న పోలీసులు.. నిందితులను గుర్తించే పనిలో పడ్డారు. అయితే ఎంత నగదు దోచుకెళ్లారనేది విచారణలో తేలాల్సి ఉందని ఎస్పీ షాగన్ గౌతమ్ పేర్కొన్నారు.

ఇదీ చదవండి:రాష్ట్రాలకు అవతరణ దినోత్సవ శుభాకాంక్షలు తెలిపిన మోదీ