రాజస్థాన్​లో జమ్ముతావి ఎక్స్​ప్రెస్​ రైల్లో మంటలు

రాజస్థాన్​ పాళి జిల్లాలోని రాణి రైల్వే స్టేషన్​ సమీపంలో జమ్ముతావి ఎక్స్​ప్రెస్​ రైలు ఇంజిన్​లో మంటలు చెలరేగాయి. ఎటువంటి ప్రమాదం సంభవించలేదని రైల్వే శాఖ తెలిపింది. ఘటనపై విచారణ జరుపుతున్నట్లు ప్రకటించింది.

జమ్ముతావి ఎక్స్​ప్రెస్ ఇంజిన్​లో అకస్మాత్తుగా మంటలు చెలరేగాయి. ప్రమాదాన్ని గుర్తించిన లోకోపైలెట్ రైలును వెంటనే నిలిపివేశాడు. భయంతో ప్రయాణికులు పరుగులు తీశారు. రైలులో ఉన్న అగ్నిమాపక పరికరాలతో మంటలు అదుపుచేయడానికి ప్రయత్నించినా ఫలితం లేకపోయింది.

శనివారం సాయంత్రం ఘటన జరిగిన వెంటనే అధికారులు అగ్నిమాపక సిబ్బందికి సమాచారం అందించారు. ఘటనాస్థలానికి చేరుకున్న అగ్నిమాపక సిబ్బంది మంటలను అదుపు చేశారు.

ఈ ఘటనతో ఆ మార్గంలో ప్రయాణించే పలు రైళ్ల రాకపోకలకు మూడు గంటలపాటు అంతరాయం ఏర్పడింది.

ప్రమాదంలో ఎలాంటి ప్రాణనష్టం జరగలేదని, ఘటనపై విచారణ జరుపుతున్నట్లు రైల్వేశాఖ ప్రకటించింది.