ప్రపంచంలోనే ఎత్తైన సర్దార్ వల్లభాయ్పటేల్ ఐక్యతా విగ్రహానికి సరికొత్త కళను తీసుకొచ్చే ప్రయత్నంలో ఉంది గుజరాత్కు చెందిన ఓ బృందం. ఇనుముతో తయారు చేసిన అనేక రకాల జెముడు జాతి మొక్కలతో ఐక్యతా విగ్రహం చుట్టూ అలంకరించేందుకు సిద్ధమైంది వడోదరలోని మహారాజాసయాజీరావు యూనివర్సిటీ బృందం. అంతే కాదు ప్రధాని నరేంద్ర మోదీ, ఆ రాష్ట్ర ముఖ్యమంత్రి విజయ్ రూపానీల పెయింటింగ్లనూ ఇనుప జెముడు తోటలో ఏర్పాటు చేయనున్నారు.
ఐక్యతా విగ్రహం చుట్టూ.. ఇనుప మొక్కలతోట!
పర్యటకులను ఆకర్షించేందుకు విభిన్న కళాఖండాలను సృష్టిస్తోందీ బృందం. రంగు రంగుల ఇనుపనాగ జెముడు, బ్రహ్మ జెముడు వంటి మొక్కలను తయారు చేస్తున్నారు. ఈ ఇనుప కాక్టస్(జెముడు) మొక్కల తయారీలో హాని రహిత రంగులను ఉపయోగిస్తున్నారు. సుమారు నాలుగు అడుగుల నుంచి పదహారు అడుగుల వరకు ఉండే కాక్టీని అధ్యాపకులు రూపొందించారు.