దేశవ్యాప్తంగా 'అన్లాక్-2' కొనసాగుతోన్న తరుణంలోనే విశ్వవిద్యాలయాలు సహా ఇతర విద్యాసంస్థల చివరి సెమిస్టర్ పరీక్షలను జరపాలని నిర్ణయించింది కేంద్ర మానవ వనరుల అభివృద్ధి శాఖ(ఎంహెచ్ఆర్డీ). వివిధ కోర్సుల్లో చివరి సంవత్సరం చదువుతోన్న విద్యార్థులకు జరిపే ఈ పరీక్షలను సెప్టెంబర్లో నిర్వహించాలని ఎంహెచ్ఆర్డీ ఆదేశించింది.
గతంలో జులైలో పరీక్షలు నిర్వహించాలని సూచించిన యూనివర్శిటీ గ్రాంట్స్ కమిషన్(యూజీసీ).. తాజాగా వాటిని సెప్టెంబర్లో జరపాలని నిర్ణయం తీసుకుంది ఎంహెచ్ఆర్డీ. తుది సెమిస్టర్ పరీక్షలు నిర్వహించడం తప్పనిసరని యూజీసీ స్పష్టం చేసింది. ఎంహెచ్ఆర్డీ ప్రకటనతో ఆఖరి సెమిస్టర్ పరీక్షల నిర్వహణ విషయంలో తలెత్తిన సందేహాలపై సందిగ్ధత వీడింది.
యూజీసీ సూచనల మేరకు..
కరోనాపై తాజా పరిస్థితులను పరిగణలోకి తీసుకొని పరీక్షల నిర్వహణకు సంబంధించి మార్గదర్శకాల్లో సవరణలు చేయాలని ఇటీవల ఎంహెచ్ఆర్డీ మంత్రి రమేశ్ పోఖ్రియాల్కు సూచించింది యూజీసీ. ఈ నేపథ్యంలో సోమవారం ప్రత్యేకంగా భేటీ అయిన కమిషన్.. సవరించిన మార్గదర్శకాలను విడుదల చేసింది. ఈ ఆదేశాలను ఆయా విశ్వవిద్యాలయాలు, విద్యాసంస్థలు తప్పనిసరిగా పాటిస్తూ పరీక్షల నిర్వహణ చేపట్టాల్సి ఉంటుంది.
ఆ మార్గదర్శకాలివే..
- చివరి సెమిస్టర్ పూర్తయ్యేలోపు విశ్వవిద్యాలయం సాధ్యాసాధ్యాలను బట్టి తప్పనిసరిగా పరీక్షలను నిర్వహించాలి. ఆఫ్లైన్, ఆన్లైన్ పద్ధతుల్లో లేదా రెండింటి మిశ్రమంగా పరీక్షలు జరుపుకునేందుకు వీలుంటుంది. బ్యాక్లాక్ విద్యార్థులకు కూడా ఈ విధానం వర్తిస్తుంది.
- సెప్టెంబర్ నెలలో జరిగే పరీక్షలకు ఒకటి లేదా రెండు పరీక్షలకు హాజరుకాలేని విద్యార్థులకు.. మరోసారి ప్రత్యేకంగా పరీక్షలు నిర్వహించాలి. అయితే 2019-20 విద్యార్థలకు మాత్రం ఈ ఒక్కసారి మాత్రమే అవకాశమివ్వాలి.
- ఏప్రిల్లో సూచించినట్లుగా మిగిలిన సెమిస్టర్ విద్యార్థులకు అంతర్గత పరీక్షలు, గత సెమిస్టర్ పరీక్షల మార్కులను పరిగణలోకి తీసుకొని గ్రేడ్లు ఇచ్చుకోవచ్చు.
ఇదీ చదవండి:కరోనా కాలంలోనూ అక్కడ పదో తరగతి పరీక్షలు
