'ఐదో విడత' ప్రచారానికి తెర.. 6న పోలింగ్​

సార్వత్రిక ఎన్నికల ఐదో దశ ప్రచారానికి తెరపడింది. సోమవారం ప్రశాంత వాతావరణంలో ఎన్నికలు నిర్వహించేందుకు ఈసీ అన్ని ఏర్పాట్లు చేస్తోంది.

సార్వత్రిక ఎన్నికల ఐదో దశ పోలింగ్ జరిగే నియోజకవర్గాల్లో ప్రచార పర్వం ముగిసింది. 7 రాష్ట్రాల్లోని 51 లోక్​సభ స్థానాలకు ఈ నెల 6న పోలింగ్​ జరగనుంది. 674 మంది అభ్యర్థుల భవితవ్యాన్ని 8.75 కోట్ల మంది ప్రజలు ఈవీఎంలలో నిక్షిప్తం చేయనున్నారు.

మూడు, నాలుగో విడతలో పోలింగ్​ జరిగిన జమ్ముకశ్మీర్​లోని అనంతనాగ్​ లోక్​సభ నియోజకవర్గం పరిధిలోని కొన్ని ప్రాంతాల్లో ఐదో దశలో ఓటింగ్​ జరగనుంది.

భారీ భద్రత

పారదర్శకంగా, ప్రశాంతంగా ఎన్నికలు నిర్వహించేందుకు పటిష్ఠ భద్రతను ఏర్పాటు చేసింది ఎన్నికల సంఘం. హింసాత్మక ఘటనలు జరుగుతున్న పశ్చిమ్​బంగా​లో భారీగా బలగాలను మోహరించింది.

ప్రధాన పార్టీల మధ్యే పోటీ...

ప్రధాన పార్టీలైన భాజపా, కాంగ్రెస్​ మధ్యే ప్రధాన పోటీ ఉండనుంది. మధ్యప్రదేశ్​, రాజస్థాన్​లలో ఇటీవల ప్రభుత్వాన్ని ఏర్పాటు చేసిన కాంగ్రెస్​.. ఈ ఎన్నికల్లోనూ అధిక స్థానాలను కైవసం చేసుకోవాలని పట్టుదలగా ఉంది. అదే సమయంలో మళ్లీ పుంజుకోవాలనుకుంటోంది భాజపా.