'మెరుపు దాడి 3.0' భయాలతో పాక్​ గజగజ

జమ్ముకశ్మీర్​ హంద్వారా ఘటన అనంతరం భారత్​ ప్రతీకార దాడులకు దిగుతుందేమోనని పాకిస్థాన్ భయాందోళన చెందుతున్నట్లు అధికారిక వర్గాలు తెలిపాయి. భారత సైన్యం మరోసారి మెరుపు దాడులు నిర్వహిస్తుందేమోనని పాక్ సైన్యంలో కలవరం మొదలైనట్లు పేర్కొన్నాయి. అందుకే పొరుగు దేశం యుద్ధవిమానాలతో గస్తీని పెంచినట్లు వెల్లడించాయి.

మెరుపు దాడి... ఈ పేరు చెబితేనే వణికిపోతోంది పాకిస్థాన్. ఉరి, పుల్వామా ఘటనల అనంతరం పొరుగు దేశానికి ఆ స్థాయిలో బుద్ధి చెప్పింది భారత్. ఇప్పుడు అదే తరహాలో భారత్​ తమను చావు దెబ్బకొడుతుందని గజగజలాడుతోంది పాక్.

జమ్ముకశ్మీర్​ హంద్వారాలో ఉగ్రవాదులతో ఇటీవల జరిగిన భీకర ఎన్​కౌంటర్లో భారత సైన్యం కల్నల్ సహా ఐదుగురు జవాన్లను కోల్పోయింది.​ ఈ ఘటన అనంతరం మనం ఎలాంటి ప్రతీకార దాడులతో విరుచుకుపడతామోనని పాకిస్థాన్​లో భయం మొదలైందని అధికారిక వర్గాలు తెలిపాయి. పాక్ సైన్యం వారి భూభాగంలో యుద్ధవిమానాలతో పెట్రోలింగ్ కార్యకలాపాలను పెంచడమే ఇందుకు నిదర్శనమని చెప్పాయి. హంద్వాారా ఘటన జరిగిన సమయంలోనూ పాక్​ గగనతలంలో యుద్ధవిమానాలతో అభ్యాసాలు జరిగినట్లు తమ వద్ద పక్కా సమాచారం ఉందని వెల్లడించాయి.

'భారత సైన్యం కల్నల్ మృతి అనంతరం పాకిస్థాన్ సైన్యం ఎఫ్​-16ఎస్​, జేఎఫ్-17 యుద్ధవిమానాలతో పెట్రోలింగ్ కార్యకలాపాలు పెంచింది. మన నిఘా వర్గాలు నిరంతరం వీటిని గమనిస్తున్నాయి.'

-అధికారిక వర్గాలు.

మూల్యం చెల్లించక తప్పదు..

ఇటీవలి కాలంలో కశ్మీర్​లో అశాంతి నెలకొల్పాలని ఉగ్రవాద చొరబాట్లు ప్రోత్సహించడం సహా వరుసగా కవ్వింపు చర్యలకు పాల్పడుతున్న పాక్ సైన్యానికి కచ్చితంగా తగిన రీతిలో బుద్ధి చెబుతామని భారత సైన్యాధికారులు ఇప్పటికే హెచ్చరికలు జారీ చేశారు. సాధారణ పౌరులు, జవాన్ల ప్రాణాలను బలిగొంటున్న పాక్​ మూల్యం చెల్లించుకోక తప్పదని స్పష్టం చేశారు.

గతేడాది పుల్వామాలో జరిగిన ఉగ్రదాడిలో 40 మంది జవాన్లు అమరులయ్యారు. అనంతరం పాక్​లోని బాలాకోట్​లో జైషే మహ్మద్​ ఉగ్రస్థావరంపై మెరుపు దాడులు నిర్వహించింది భారత సైన్యం. ఉగ్రవాద శిబిరాలను మట్టుబెట్టి చాపుదెబ్బకొట్టింది. 2016లో జరిగిన ఉరి ఘటన తర్వాత కూడా మెరుపు దాడులు చేసి బదులు తీర్చుకుంది.