వ్యవసాయ చట్టాలను నిరసిస్తూ దేశవ్యాప్తంగా రైతుల ఆందోళనలు

13:57 September 28

కర్ణాటక ప్రభుత్వానికి వ్యతిరేకంగా కాంగ్రెస్ తన కార్యాలయంలో నిరసనలు చేపట్టింది. కాంగ్రెస్ రాష్ట్ర అధ్యక్షుడు డీకే శివకుమార్​, ఇంఛార్జ్ రణ్​దీప్​ సుర్జేవాలా, మాజీ ముఖ్యమంత్రి సిద్ధ రామయ్య ఈ కార్యక్రమంలో పాల్గొన్నారు.

13:28 September 28

కర్ణాటక కొడగు జిల్లాలో వ్యవసాయ చట్టాలకు వ్యతిరేకంగా ఆందోళనలు చేపట్టిన కాంగ్రెస్, జేడీఎస్​, ఎస్​డీపీఐ కార్యకర్తలను పోలీసులు నిర్బంధించారు.

12:46 September 28

పంజాబ్ ముఖ్యమంత్రి నిరసన..

వ్యవసాయ చట్టాలకు వ్యతిరేకంగా నిరసన కార్యక్రమంలో పాల్గొన్నారు పంజాబ్ ముఖ్యమంత్రి కెప్టెన్​ అమరీందర్ సింగ్​. భగత్​ సింగ్​ నగర్​లోని ఖాట్కర్ కలన్​లో ఆందోళనకారులకు మద్దతు తెలిపారు. అంతకు ముందు భగత్​​ సింగ్ జయంతి సందర్భంగా ఆయన విగ్రహానికి నివాళులు అర్పించారు అమరీందర్​.

12:09 September 28

మానవహారం..

వ్యవసాయ చట్టాలను నిరసిస్తూ కర్ణాటక శివమొగ్గలోని అశోక సర్కిల్​లో మానవ హారంగా నిలబడ్డారు రైతు సంఘం, జేడీఎస్​, ఎస్డీపీఐ, కర్ణాటక రక్షణ వేదిక కార్యకర్తలు. జెండాలు, బ్యానర్లు పదర్శించారు. డప్పులు వాయించి ఆందోళనలు చేపట్టారు.

11:59 September 28

వ్యవసాయ చట్టాలకు వ్యతిరేకంగా కర్ణాటకలో రైతు సంఘాలు బంద్ పాటిస్తూ ఆందోళనలు నిర్వహిస్తున్నాయి. బెంగళూరులోని పుట్టన్న చెట్టి టౌన్​ హాల్​ ఎదురుగా మహిళలు నృత్య ప్రదర్శనతో వినూత్న రీతిలో నిరసన వ్యక్తం చేశారు.

11:49 September 28

వ్యవసాయ చట్టాలను తమిళనాడు పొరుగు రాష్ట్రం కేరళ వ్యతిరేకిస్తోందని చెప్పారు డీఎంకే అధ్యక్షుడు ఎంకే స్టాలిన్. ఈ విషయంపై పినరయ్ విజయన్ సర్కారు న్యాయస్థానాన్ని ఆశ్రయించే యోచనలో ఉందని పేర్కొన్నారు. అదే తరహాలో తమిళనాడు ప్రభుత్వం కూడా కోర్టుకు వెళ్లాలని సూచించారు. లేకపోతే ఆ బాధ్యతను ప్రతిపక్షాలు తీసుకుంటాయని తేల్చి చెప్పారు.  తమిళనాడు కాంచీపురంలోని కీజంబి గ్రామంలో రైతుల నిరసన కార్యక్రమంలో పాల్గొని ఈ వ్యాఖ్యలు చేశారు స్టాలిన్.

11:20 September 28

కర్ణాటకలో వ్యవసాయ చట్టాల వ్యతిరేక ఆందోళనల్లో భాగంగా శివమొగ్గలో బైక్ ర్యాలీ నిర్వహించారు జేడీఎస్ కార్యకర్తలు. లక్షీ థియేటర్ సర్కిల్​ వద్ద వారిని పోలీసులు అడ్డుకున్నారు. దీంతో కాసేపు అక్కడ ఉద్రిక్త వాతావరణం నెలకొంది.

11:16 September 28

దిల్లీ గేట్ వద్ద ట్రాక్టర్​కు నిప్పు పెట్టిన ఘటనలో పంజాబ్​కు చెందిన ఐదుగురిని అదుపులోకి తీసుకున్నట్లు పోలీసులు తెలిపారు. న్యాయపరమైన చర్యలకు ఉపక్రమించినట్లు చెప్పారు.

11:12 September 28

ట్రాక్టర్​కు నిప్పు..

కేంద్రం తీసుకొచ్చిన నూతన వ్యవసాయ చట్టాలను వ్యతిరేకిస్తూ పంజాబ్​ యూత్​ కాంగ్రెస్​ ఆధ్వర్యంలో దిల్లీలోని ఇండియాగేట్​ వద్ద ఓ ట్రాక్టర్​కు నిప్పంటించారు ఆందోళన కారులు. అనంతరం భగత్​సింగ్​ చిత్రపటంతో నిరసనలు చేపట్టారు.

11:09 September 28

తమిళనాడులో 

వ్యవసాయ చట్టాలకు వ్యతిరేకంగా తమిళనాడు కాంచీపురంలోని కీజంబి గ్రామంలో రైతులు నిరసనలు చేపట్టారు. డీఎంకే అధ్యక్షుడు ఎంకే స్టాలిన్ ఈ కార్యక్రమంలో పాల్గొని మద్దతు తెలిపారు.

10:44 September 28

వ్యవసాయ చట్టాలకు వ్యతిరేకంగా దేశవ్యాప్త ఆందోళనలు

వ్యవసాయ చట్టాలకు వ్యతిరేకంగా దేశవ్యాప్త ఆందోళనలు

కేంద్రం నూతనంగా తీసుకొచ్చిన వ్యవసాయ చట్టాలకు వ్యతిరేకంగా దేశవ్యాప్తంగా ఆందోళనలు ఉద్ధృతమవుతున్నాయి. అఖిల భారత కిసాన్​ సభ(ఏఐకేఎస్​) సహా ఇతర రైతు సంఘాలు కర్ణాటకలో బంద్​ నిర్వహిస్తున్నాయి.  రాష్ట్రవ్యాప్తంగా నిరసనలు చేపట్టాయి. రోడ్లపై ఆందోళనలకు దిగాయి.