పేడ తెచ్చి పోసి.. భాజపా నేత ఇంటి ముందు ఆందోళన

పంజాబ్​లో ఓ భాజపా నేత ఇంటి ముందు నిరసన చేపట్టారు గుర్తుతెలియని వ్యక్తులు. హోసియార్​పుర్​లోని ఆయన ఇంటి ముందు పేడ తెచ్చి పోసి.. సాగు చట్టాలపై కేంద్ర ప్రభుత్వానికి వ్యతిరేకంగా నినాదాలు చేశారు.

పంజాబ్​లోని హోసియార్​పుర్​లో భారతీయ జనతా పార్టీ నేత, పంజాబ్​ మాజీ మంత్రి తీక్షణ్​ సూద్​ ఇంటి ముందు గుర్తు తెలియని వ్యక్తులు శుక్రవారం ఆందోళనకు దిగారు. ట్రక్కులో పేడను తీసుకొచ్చి ఇంటి ముందు పారబోశారు. కేంద్రం తెచ్చిన కొత్త వ్యవసాయ చట్టాలకు వ్యతిరేకంగా నినాదాలు చేశారు.

అనంతరం.. భాజపా కార్యకర్తలు తీక్షణ్​ సూద్​ ఆధ్వర్యంలో హోసియార్​పుర్​లోని జోదామల్​ రహదారిపై ధర్నాకు దిగారు. అల్లరి మూకలే ఇలా చేశాయని, బాధ్యుల్ని గుర్తించి తక్షణమే శిక్షించాలని డిమాండ్ చేశారు.

సీఎం స్పందన..

మాజీ మంత్రి ఇంటి ముందు జరిగిన ఘటనపై ముఖ్యమంత్రి అమరీందర్​ సింగ్​ స్పందించారు. వ్యక్తుల్ని లక్ష్యంగా చేసుకుని జరిగే ఇలాంటి ఘటనలు.. రైతుల శాంతియుత ఆందోళనకు కూడా చెడ్డపేరు తెస్తాయన్నారు. రైతులకు మద్దతు పేరిట ఎవరూ చట్టాన్ని చేతుల్లోకి తీసుకోవద్దని ఆయన హెచ్చరించారు.

ఇదీ చదవండి:'చర్చల్లో పురోగతి లేకుంటే 6న ట్రాక్టర్​ ర్యాలీ'