అగ్ర కథానాయకుడు రజనీకాంత్ ఇంట్లో బాంబు ఉందంటూ ఓ గుర్తు తెలియని వ్యక్తి చేసిన ఫోన్‌ కారణంగా చెన్నై పోలీసులు గురువారం ఉరుకులు పరుగులు పెట్టారు. అది ఫేక్ అని తెలిశాక కాల్ చేసిన వ్యక్తి కోసం గాలింపు చేపట్టారు. కడలూర్ జిల్లా సమీపంలోని నెల్లికుప్పంకు చెందిన ఎనిమిదో తరగతి విద్యార్థి ఈ పని చేసినట్లు గుర్తించారు.
బాలుడు మానసిక ఆరోగ్య సమస్యలు ఎదుర్కొంటున్నాడని పోలీసులకు తెలిసింది. వైద్య రికార్డులు పరిశీలించిన అనంతరం అతడిని వదిలిపెట్టారు.
ఇదీ జరిగింది..
గురువారం మధ్యాహ్నం 108 నెంబర్‌కు ఓ గుర్తు తెలియని వ్యక్తి ఫోన్‌ చేసి రజనీకాంత్ ఇంట్లో బాంబు ఉందని చెప్పాడు. వెంటనే హుటాహుటిన రజనీ ఇంటికి చేరుకున్నారు పోలీసులు. అయితే కరోనా నేపథ్యంలో వారిని ఇంట్లోకి అనుమతించలేదు. 10 నిమిషాల పాటు వేచి చూశారు. సెక్యూరిటీ గార్డ్ క్యాబిన్, రజనీ ఇంటి చుట్టూ ముమ్మర తనిఖీలు చేపట్టి వెనుదిరిగారు.
ప్రస్తుతం రజనీకాంత్ శివ దర్శకత్వంలో ‘అన్నాత్తే’ చిత్రంలో నటిస్తున్నారు. లాక్‌డౌన్‌ కారణంగా ఈ సినిమా షూటింగ్‌ వాయిదా పడింది. కీర్తిసురేశ్‌, ఖుష్భూ, మీనా, కీలక పాత్రలు పోషిస్తున్నారు. ఈ ఏడాది చివరి నాటికి షూటింగ్‌ పూర్తి చేసి, సంక్రాంతి కానుకగా ఈ సినిమాను ప్రేక్షకుల ముందుకు తీసుకురావాలని చిత్ర బృందం భావించింది. లాక్‌డౌన్‌ కారణంగా చిత్రీకరణ తాత్కాలికంగా ఆగిపోయినందున సినిమా విడుదల మరింత ఆలస్యం కానుంది.
ఇదీ చూడండి: లేహ్, లద్దాఖ్ సరిహద్దులో యుద్ధ విమానాలతో గస్తీ