ఐక్యరాజ్య సమితి ప్రధాన కార్యదర్శి ఆంటోనియో గుటెర్రస్ నూతన యువ సలహాదారుల బృందంలో భారతీయురాలికి చోటు దక్కింది. ఒడిశాకు చెందిన పర్యావరణ ఉద్యమకారిణి అర్చనా సోరెంగ్ ఈ గౌరవాన్ని పొందారు.
సోరెంగ్ సహా ఈ బృందంలో ఏడుగురు సభ్యులు ఉంటారు. వీరంతా 18-28 మధ్య వయసు వారు. సోరెంగ్ వయసు 24 ఏళ్లు. వాతావరణ సమస్యలపై పరిష్కారాలు, అవలంబించాల్సిన విధానాలపై గుటెర్రస్కు ఈ బృందం ఎప్పటికప్పుడు సలహాలు ఇస్తుంది.
"సోరెంగ్ పరిశోధనల్లో అనుభవజ్ఞురాలు. ఆమె స్థానిక సమాజాల సంప్రదాయాలు, సాంస్కృతిక పద్ధతులకు ప్రోత్సాహం, సంరక్షణతోపాటు వాటి చరిత్రకు లిఖిత రూపం కల్పించేందుకు కృషి చేస్తున్నారు."
- ఐరాస ప్రకటన
బృందంలో సభ్యులు..
వాతావరణ సమస్యలకు సంబంధించి ఈ బృందానికి నిర్భయంగా, నిర్మొహమాటంగా సలహాలు ఇచ్చే అవకాశం కల్పించారు. ఈ బృందంలో నిస్రీన్ ఎల్సైమ్ (సుడాన్), ఎర్నెట్స్ గిబ్సన్ (ఫిజి), వ్లాదిస్లావ్ కైయిమ్ (మాల్డోవా), సోఫియా కియాన్నీ (అమెరికా), నాథన్ మెటినియర్ (ఫ్రాన్స్), పాలొమా కోస్టా (బ్రెజిల్) ఉన్నారు.
ఆ సదస్సుతో..
గతేడాది జరిగిన యువత పర్యావరణ సదస్సు నేపథ్యంలో ఈ బృందం ఏర్పాటుకు బీజం పడింది. ఆ సదస్సులో 140 దేశాల నుంచి 1000 మంది పర్యావరణ ఉద్యమకారులు పాల్గొన్నారు. గుటెర్రస్ 2018 సెప్టెంబర్లో ప్రారంభించిన ఐరాస యువవ్యూహంలో భాగంగా ఈ సదస్సును నిర్వహించారు.
ఇదీ చూడండి:విద్యా విధానంలో చేసిన నూతన సవరణలు ఇవే..
