కమల్​ సర్కార్​కు బలపరీక్షపై సుప్రీంలో వ్యాజ్యం

కమల్​నాథ్​ ప్రభుత్వానికి వెంటనే బలపరీక్ష నిర్వహించాలని సుప్రీంకోర్టును ఆశ్రయించారు శివరాజ్​ సింగ్​ చౌహాన్​. గవర్నర్​ ఆదేశించినప్పటికీ... స్పీకర్​ విశ్వాసపరీక్ష నిర్వహించకుండా సభను వాయిదా వేశారని వ్యాజ్యంలో పేర్కొన్నారు.

మధ్యప్రదేశ్​ రాజకీయాలు సుప్రీంకోర్టుకు చేరాయి. రాష్ట్రంలో రాజకీయ సంక్షోభం నెలకొన్న నేపథ్యంలో తక్షణమే బలపరీక్ష నిర్వహించే విధంగా కమల్​నాథ్ ప్రభుత్వానికి ఆదేశాలు జారీ చేయాలని వ్యాజ్యం దాఖలైంది. ఆ రాష్ట్ర​ మాజీ ముఖ్యమంత్రి, భాజపా అగ్రనేత శివరాజ్​ సింగ్​ చౌహాన్​ ఈ పిటిషన్ దాఖలు చేశారు.

జ్యోతిరాదిత్య సింథియా కాంగ్రెస్​ను వీడాలన్న సంచలన నిర్ణయంతో కమల్​నాథ్​ ప్రభుత్వం మెజారిటీని కోల్పోయే పరిస్థితిలో పడింది. ఈ నేపథ్యంలోనే సోమవారం విశ్వాసపరీక్ష నిర్వహించాలని గవర్నర్​ ఆదేశించారు.

గవర్నర్​ ఆదేశాలను పట్టించుకోకుండా.. స్పీకర్ సభను ఈ నెల 26వరకు ​ వాయిదావేశారని పిటిషన్​లో పేర్కొన్నారు భాజపా నేత.

గవర్నర్​ వద్దకు...

విశ్వాస పరీక్ష జరగని కారణంగా గవర్నర్​ లాల్జీ టాండన్​ను కలిశారు 106మంది మధ్యప్రదేశ్​ భాజపా సభ్యులు. కమల్​నాథ్​ ప్రభుత్వం మెజారిటీని కోల్పోయిందని.. అందువల్ల కాంగ్రెస్​ అధికారంలో ఉండే అర్హత లేదని గవర్నర్​కు తెలిపారు. అసెంబ్లీలో తక్షణమే బలపరీక్ష నిర్వహించేందుకు ఆదేశాలు జారీ చేయాలని గవర్నర్​కు వినతి పత్రాన్ని అందించారు.

బలపరీక్ష జరగని నేపథ్యంలో తగిన చర్యలు చేపడతామని భాజపా ఎమ్మెల్యేలకు గవర్నర్​ హామీ ఇచ్చారు. వారి హక్కులను ఎవరు హరించలేరని తెలిపారు.

ఇదీ చూడండి:-సంక్షోభంలో కాంగ్రెస్​ ప్రభుత్వం.. కమల్​కు సింధియా షాక్​