భారత్​ భేరి: దేశవ్యాప్తంగా పోలింగ్​ ప్రారంభం

దేశంలోని మొత్తం 91 లోక్​సభ స్థానాలకు ఎన్నికలు ప్రారంభమయ్యాయి. అన్ని పోలింగ్‌ కేంద్రాల వద్ద అధికారులు కట్టుదిట్టమైన భద్రతా ఏర్పాట్లు చేశారు. ఉదయం నుంచే ఓటు వినియోగించుకోవడానికి బారులు తీరారు ప్రజలు. 14 కోట్ల 20 లక్షల 54 వేల మంది ఓటర్లు 1279 మంది అభ్యర్థుల భవితవ్యం తేల్చనున్నారు. మిగిలిన 6 విడతల పోలింగ్ ముగిశాక మే 23న ఫలితాలు వెలవడనున్నాయి.

సార్వత్రిక ఎన్నికలు ప్రారంభమయ్యాయి. ఉదయం నుంచే ఓటు వినియోగానికి లైన్లలో వేచి ఉన్నారు ఓటర్లు. మొత్తం 91 లోక్​సభ స్థానాలకు తొలిదశలో పోలింగ్​ జరుగుతుంది. 1,279 మంది అభ్యర్థుల భవితవ్యాన్ని 14 కోట్ల 20 లక్షల 54 వేల మంది ఓటర్లు ఈవీఎంలలో నిక్షిప్తం చేయనున్నారు.

మొత్తం 20 రాష్ట్రాలు, కేంద్రపాలిత ప్రాంతాల్లో తొలిదశ పోలింగ్​ మొదలైంది. ఎన్నికల కోసం పటిష్ఠ బందోబస్తు ఏర్పాటు చేశారు అధికారులు. సమస్యాత్మక ప్రాంతాలపై ప్రత్యేక దృష్టిపెట్టారు. పోలింగ్ కేంద్రాల్లో సీసీ కెమెరాలతో నిఘా పెట్టారు.

2019 ఎన్నికలు

తెలుగు రాష్ట్రాల్లో...

ఆంధ్రప్రదేశ్​ -25, తెలంగాణ- 17 కలిపి మొత్తం 42 లోక్​సభ స్థానాలకు పోలింగ్​ జరుగుతుంది. మొదటి విడతలోనే రెండు తెలుగు రాష్ట్రాల్లో ఎన్నికలు ముగియనున్నాయి. పోలీసులు భారీ బందోబస్తు ఏర్పాటుచేశారు.

యూపీలో భద్రత నడుమ...

అత్యధిక లోక్​సభ స్థానాలు కలిగిన ఉత్తరప్రదేశ్​లో 8 లోక్​సభ నియోజకవర్గాలకు ఎన్నికలు ప్రారంభమయ్యాయి. ఎలాంటి ఉద్రిక్తతలు తలెత్తకుండా ఎన్నికల సంఘం భద్రతా ఏర్పాట్లు చేసింది. లక్ష మందికిపైగా భద్రతా సిబ్బందిని మోహరించారు.

బస్తర్​ కట్టుదిట్టం..

ఛత్తీస్​గఢ్​ బస్తర్​ లోక్​సభ నియోజకవర్గం ప్రత్యేకం. మావోయిస్టు ప్రభావిత ప్రాంతం కారణంగా ఇక్కడ 80 వేల మంది సిబ్బంది పహారా కాస్తున్నారు. దంతెవాడ బస్తర్​ పరిధిలోకే వస్తుంది. 741 పోలింగ్​ కేంద్రాలను అత్యంత సమస్యాత్మకంగా గుర్తించారు

తొలిసారి పూర్తిస్థాయిలో...

సార్వత్రిక ఎన్నికల కోసం తొలిసారి పూర్తిస్థాయిలో వీవీప్యాట్​ ఈవీఎంలు ఉపయోగిస్తోంది ఈసీ. వీవీప్యాట్​లో వచ్చే రసీదు చూసి, మన ఓటు ఎవరికి పడిందో నిర్ధరించుకోవచ్చు.