మనీలాండరింగ్ కేసులో అరెస్టయిన కర్ణాటక మాజీ మంత్రి, కాంగ్రెస్ నేత డీకే శివకుమార్ను ఈనెల 13 వరకు ఈడీ కస్టడీకి అప్పగించింది దిల్లీలోని రౌస్ ఎవెన్యూ కోర్టు. కేసులో సమగ్ర దర్యాప్తు కోసం నిర్బంధ విచారణకు అనుమతించాలన్న ఎన్ఫోర్స్మెంట్ డైరక్టరేట్ విజ్ఞప్తి మేరకు ఈ నిర్ణయం తీసుకుంది.
వాడీవేడి వాదనలు...
కస్టడీపై నిర్ణయం తీసుకోవడానికి ముందు న్యాయస్థానంలో వాడీవేడి వాదనలు సాగాయి.
"ఆదాయపు పన్ను శాఖ విచారణ, సాక్షుల వాంగ్మూలం ప్రకారం శివకుమార్కు వ్యతిరేకంగా ఆధారాలు ఉన్నాయి. ఈడీ విచారణలో ఆయన సహకరించలేదు. సోదాల్లో దొరికిన సొమ్ముపై ఆయన నుంచి స్పందన లేదు. శివకుమార్ కీలకమైన పదవిలో ఉండగా ఆయన ఆస్తి భారీగా పెరిగింది. అక్రమ ఆస్తులు, పత్రాలకు సంబంధించి విచారణ చేయాల్సి ఉంది. అందుకు నిర్బంధ విచారణ అత్యవసరం. లేదా దర్యాప్తు తప్పుదారి పట్టే అవకాశం ఉంది. "
-ఎన్ఫోర్స్మెంట్ డైరెక్టరేట్
ఈడీ కస్టడీ కోరటంపై శివకుమార్ తరఫు న్యాయవాది అభిషేక్ మను సింఘ్వీ అభ్యంతరం వ్యక్తం చేశారు. ఇప్పటికే 33 గంటలపాటు ప్రశ్నించారని తెలిపారు. ఈడీ సరైన ఆధారాలు చూపే వరకు కస్టడీకి అనుమతించవద్దవని సింఘ్వీ కోరారు. శివకుమార్ తరఫున బెయిల్ పిటిషన్ వేశారు.
కర్ణాటకలో బంద్
శివకుమార్ అరెస్టును వ్యతిరేకిస్తూ నేడు కర్ణాటకవ్యాప్తంగా నిరసన కార్యక్రమాలు చేపట్టింది కాంగ్రెస్. కొన్నిచోట్ల ప్రభుత్వ వాహనాలపై రాళ్లు రువ్వి, బస్సులకు నిప్పంటించారు ఆందోళనకారులు.