టీఆర్​పీ కుంభకోణం: రంగంలోకి ఈడీ- కేసు నమోదు

ఇటీవల వెలుగు చూసిన నకిలీ టీఆర్​పీ కుంభకోణంలో ఎన్​ఫోర్స్​మెంట్​ డైరెక్టరేట్​ కేసు నమోదు చేసింది. ఈ కేసులో ముంబయి పోలీసులు నమోదు చేసిన ఎఫ్​ఐఆర్​ ఆధారంగా ఈడీ రంగంలోకి దిగినట్లు అధికారిక వర్గాలు తెలిపాయి.

ముంబయి నకిలీ టీఆర్​పీ కుంభకోణంలో ఎన్​ఫోర్స్​మెంట్ డైరెక్టరేట్​ (ఈడీ) రంగంలోకి దిగింది. పోలీసుల ఎఫ్​ఐఆర్​తో సమానమైన కేస్​ ఇన్ఫర్మేషన్ రిపోర్ట్ (ఈసీఐఆర్​)ను మనీలాండరింగ్ చట్టం కింద దాఖలు చేసింది. ఈ మేరకు అధికార వర్గాలు తెలిపాయి.

ముంబయి పోలీసులు అక్టోబర్​లో నమోదు చేసిన ఎఫ్​ఐఆర్​ పరిశీలించిన తర్వాత ఈడీ కేసు నమోదు చేసినట్లు తెలుస్తోంది. అయితే, కొత్త కేసు లేదా ఈసీఐఆర్​ ఆధారంగా ఈడీ విచారణ చేపట్టే అవకాశం ఉందని సమాచారం.

ఇప్పటివరకు 12 మంది అరెస్టు..

టీఆర్​పీ కుంభకోణంలో రిపబ్లిక్​ టీవీ డిస్ట్రిబ్యూషన్​ హెడ్​ ఘనశ్యామ్​ సింగ్​ను ముంబయి క్రైం బ్రాంచ్​ పోలీసులు నవంబర్ 10న అరెస్టు చేశారు. ఈ కేసును విచారిస్తున్న​ క్రైమ్‌ ఇంటెలిజెన్స్‌ యూనిట్‌ (సీఐయూ) ఇప్పటివరకు 12 మందిని అదుపులోకి తీసుకొని విచారిస్తోంది.

టీఆర్‌పీల విషయంలో కొన్ని ఛానళ్లు మోసాలకు పాల్పడుతున్నాయని బ్రాడ్​కాస్ట్​ ఆడియన్స్ రీసెర్చ్​ కౌన్సిల్​(బార్క్​) ఇప్పటికే పలు మీడియా సంస్థలపై కేసులు నమోదు చేసింది. కొంతమందికి డబ్బులు ఇచ్చి.. తమ ఛానళ్లు చూసేలా చేస్తున్నాయని ఆరోపణలు ఉన్నాయి.

ఇదీ చూడండి:టీఆర్​పీ స్కామ్​ బట్టబయలు- 3 ఛానళ్లపై కేసులు