భారీస్థాయిలో నగదును అక్రమంగా చలామణి చేశారన్న ఆరోపణలపై బడా హవాలా డీలర్ నరేశ్ జైన్ను ఎన్‌ఫోర్స్‌మెంట్‌ డైరెక్టరేట్‌ (ఈడీ) బుధవారం అరెస్టు చేసింది. నగదు అక్రమ చలామణి నిరోధక చట్టం (పీఎంఎల్‌ఏ) కింద ఈ చర్య తీసుకున్నట్లు చెప్పారు అధికారులు.
దాదాపు 550 డొల్ల కంపెనీలను, కనీసం 940 అనుమానాస్పద బ్యాంకు ఖాతాలను, రూ.1.07 లక్షల కోట్ల లావాదేవీలను ఈ కేసులో ఈడీ పరిశీలిస్తోంది. దేశంలో అతిపెద్ద హవాలా కేసుల్లో ఇదొకటి అవుతుందని భావిస్తున్నారు. గత కొన్నేళ్ల కాలంలో జైన్, అతని సహచరులు కలిసి దేశ విదేశాల్లో రూ.లక్ష కోట్ల మేర హవాలా/ అక్రమ ఆర్థిక లావాదేవీలకు పాల్పడి ఉంటారని అధికారులు అనుమానిస్తున్నారు. వారందరినీ విచారిస్తున్నారు.
ఎగుమతులు, దిగుమతులు జరిపినట్లుగా తప్పుడు ఇన్‌వాయిస్‌లను సృష్టించిన తీరుపైనా కొన్ని వివరాలు లభ్యమయ్యాయని, వీటన్నిటిలో దిల్లీకి చెందిన నరేశ్ జైన్ కీలక పాత్ర పోషించినట్లు కనిపిస్తోందని తెలిపారు.