పర్యావరణ పరిరక్షణకై 'ప్లాస్టిక్​' వ్యర్థాలతో ఇటుకలు

ప్లాస్టిక్​ ఇటుకలు తయారు చేయడం ఎంతో సులభమంటున్నారు బంగాల్​కు చెందిన మానస్​ మొండల్​. స్థానిక మున్సిపాలిటీలో పనిచేస్తున్న మొండల్​.. వాడిపడేసిన ప్లాస్టిక్​ను(పాలిథీన్​ కవర్లు, ఇతర వ్యర్థాలు)​బాటిళ్లల్లో పెట్టి ఇటుకల్లా తయారు చేస్తున్నారు. ఇప్పుడు ఆ ఆలోచనే జిల్లావ్యాప్తంగా ప్రసిద్ధి చెందింది.

ప్లాస్టిక్​తో ఇటుకలను తయారు చేయగలరా? అది కూడా ఒకసారి వాడి పడేసే ప్లాస్టిక్​తో? సాధ్యమే కాదు అనుకుంటున్నారా? అయితే మీరు పొరబడినట్టే. బంగాల్​లోని బిష్ణుపుర్​ జిల్లాకు చెందిన స్థానిక మున్సిపాలిటీ అధికారులు దీనిని చేసి చూపించారు.

మున్సిపాలిటీలోని సబ్​-డివిజన్​ అధికారి మానస్​ మొండల్​ ఆలోచనే ఇది. వాడిపడేసిన పాలిథీన్​ కవర్లు, చెత్తను బాటిళ్లల్లో, జాడీల్లో నింపి ఇటుకల్లా తయారు చేయడం మొదలు పెట్టారు మానస్​. ఇప్పుడు ఈ ఆలోచన స్థానికుల్లో ఉత్సాహం నింపింది.

"మున్సిపాలిటీ పరిధిలోని పాఠశాలలనే కాదు.. గ్రామాల్లోని బడులను వీటికి ఉపయోగిస్తున్నాం. ఈ ప్లాస్టిక్​ భూతం వ్యవసాయ క్షేత్రాలకు ఎంతో నష్టం. వ్యవసాయ క్షేత్రాల్లో ఇది ఎన్నో సమస్యలు తెస్తుంది. కానీ ఇప్పుడు పరిస్థితులు మారాయి. మీ వల్ల ఇంట్లో ప్లాస్టిక్​ను వినియోగించలేకపోతున్నామని తల్లిదండ్రులు అంటున్నారు. ఇంట్లో ఉన్న ప్లాస్టిక్​ను పిల్లలు బాటిళ్లల్లో పెడుతున్నారని చెబుతున్నారు." - మానస్​ మొండల్​, ఎస్​డీఓ బిష్ణుపుర్​

బాటిళ్లు పూర్తిగా నిండి తర్వాత అవి ఎంతో గట్టిగా మారుతాయి. వీటినే ఆ తర్వాత ఇటుకల్లాగా ఉపయోగిస్తున్నారు. మొండల్​ తన కుమారుడిని కూడా ఈ పనిలో భాగస్వామ్యం చేశారు. ఈ ఆలోచన విజయం సాధించిన అనంతరం దీనిపై ఇతర ప్రాంతాల్లో అవగాహన కల్పిస్తున్నారు.

"ఇంట్లో పాత బాటిళ్లు చాలా ఉన్నాయి. వాటిల్లో ప్లాస్టిక్ వ్యర్థాలు​ పెడుతున్నాం. వీటి నుంచి ఇతర వస్తువులను తయారు చేస్తాం." - ఎస్​డీఓ కుమారుడు

తొలుత ఈ పర్యావరణ హిత ఇటుకలను తన కార్యాలయాన్ని సుందరీకరించడం కోసం వినియోగించారు మొండల్​. చెట్ల చుట్టూ వీటిని అమర్చారు. కూర్చోవడానికి అనువుగా ఉండే విధంగా కూడా వీటిని ఏర్పాటు చేశారు. ఇప్పుడు మానస్​ ఆలోచన.. బిష్ణుపుర్​ వ్యాప్తంగా ప్రసిద్ధి చెందింది.

ఇదీ చూడండి:ప్లాస్టిక్ ప్రత్యామ్నాయ తయారీపై మహిళలకు శిక్షణ