ఆ నిబంధనను పునఃపరిశీలిస్తాం: ఈసీ

భారత శిక్షాస్మృతిలోని 177వ సెక్షన్​ నిబంధనను పరిశీలిస్తామని కేంద్ర ఎన్నికల సంఘం తెలిపింది. ఈవీఎంలు, వీవీప్యాట్​ యంత్రాల్లో లోపాలపై చేసిన ఫిర్యాదు నిజం కాదని తేలితే ఫిర్యాదుదారుడిపై కేసు పెట్టే అవకాశాన్ని ఈ నిబంధన కల్పిస్తోంది.

ఎలక్ట్రానిక్ ఓటింగ్‌ యంత్రాలు (ఈవీఎంలు), వీవీప్యాట్‌ యంత్రాల్లో లోపాలపై ఎవరైనా ఫిర్యాదు చేయొచ్చు. ఒక వేళ ఫిర్యాదు నిజం కాదని తేలితే ఫిర్యాదుదారుడిపై కేసు పెట్టడానికి అవకాశం కల్పిస్తుంది భారత శిక్షాస్మృతిలోని 177వ సెక్షన్‌. తాజాగా ఈ నిబంధనను పున:పరిశీలిస్తామని కేంద్ర ఎన్నికల సంఘం తెలిపింది.

సార్వత్రిక ఎన్నికల ప్రక్రియ ముగిసిపోయినందున అంతర్గతంగా చర్చించుకుని నిబంధనను సరళీకరించడంపై దృష్టి సారిస్తామని ప్రధాన ఎన్నికల కమిషనర్‌ సునీల్‌ అరోడా తెలిపారు. ఐపీసీ 177 సెక్షన్ ప్రకారం ఫిర్యాదు తప్పు అని తేలితే గరిష్ఠంగా 6 నెలల వరకు సాధారణ జైలు శిక్ష లేదా రూ.1000 జరిమానా విధించేందుకు అవకాశం ఉంది.

ఈ నిబంధనను తొలగించాలంటూ దాఖలైన పిటిషన్‌పై స్పందన తెలపాలని ఈ ఏడాది ఏప్రిల్‌లో సుప్రీంకోర్టు ఈసీని ఆదేశించింది.

ఇదీ చూడండి: 'ప్రపంచవ్యాప్తంగా ప్రమాదంలో పత్రికా స్వేచ్ఛ'