వృద్ధులకు మరింత సులువుగా 'పోస్టల్​ బ్యాలెట్'

పోస్టల్​ బ్యాలెట్​ సదుపాయాన్ని మరింత సులభతరం చేసింది ఎన్నికల సంఘం. ఇందుకు సంబంధించిన పత్రాలను ఇకపై 80ఏళ్లు పైబడినవారు, దివ్యాంగుల ఇళ్లకు బూత్​ స్థాయి అధికారే వెళ్లి ఇస్తారని పేర్కొంది. ఈ మేరకు కొత్త మార్గదర్శకాలు జారీ చేసింది.

80ఏళ్లు పైబడినవారు, దివ్యాంగులు.. ఎన్నికల్లో పోస్టల్​ బ్యాలెట్​ ద్వారా ఓటు హక్కు వినియోగించుకునే ప్రక్రియను ఎన్నికల సంఘం మరింత సులభతరం చేసింది. ఇందుకోసం కొత్త సూచనలతో కూడిన లేఖను అన్ని రాష్ట్రాల ముఖ్య ఎన్నికల అధికారులకు పంపించింది.

పోస్టల్​ బ్యాలెట్​ వినియోగించుకునేందుకు కావాల్సిన పత్రాలను.. 80ఏళ్లు పైబడినవారు, దివ్యాంగులకు స్వయంగా బూత్​ స్థాయి అధికారే(బీఎల్​ఓ) వారి ఇంటికి వెళ్లి అందించనున్నారు.

"వీరు ఒకవేళ పోస్టల్​ బ్యాలెట్​ను ఎంచుకుంటే.. బీఎల్​ఓ.. ఓటర్​ ఇంటి నుంచే 12-డీ పత్రాన్ని సేకరిస్తారు. నోటిఫికేషన్​ విడుదలైన ఐదురోజుల లోపు ఇది జరుగుతుంది. అనంతరం రిటర్నింగ్​ ఆఫీసర్​కు ఈ పత్రాలను అందిస్తారు."

--- ఎన్నికల సంఘం.

పౌర సమాజం, మీడియా నుంచి స్వీకరించిన ఫీడ్​బ్యాక్​ను దృష్టిలో పెట్టుకుని ఈ సూచనలను జారీ చేసింది ఎన్నికల సంఘం. ఇక మీదట జరిగే అన్ని ఎన్నికలకు ఇవి వర్తిస్తాయని స్పష్టం చేసింది.

కొత్త మార్గదర్శకాల ప్రకారం... ఆయా పత్రాలను డెలివరీ చేసి, తిరిగి తీసుకొచ్చేందుకు.. ఓ బృందాన్ని ఏర్పాటు చేస్తారు రిటర్నింగ్​ ఆఫీసర్​. ఇందుకు సంబంధించి ముందుగానే ఓ తేదీని చెబుతారు. అయితే ఇతర ఓటర్లతో పోల్చుకుంటే ఈ పోస్ట్​ బ్యాలెట్​ సదుపాయం భిన్నమైనదని అధికారులు తెలిపారు. పారదర్శకత కోసం పూర్తి ప్రక్రియను వీడియో తీస్తారని పేర్కొన్నారు.

ఇదీ చూడండి:-బిహార్​ ఎన్నికల్లో ప్రిసైడింగ్​ అధికారిగా 'ట్రాన్స్​జెండర్'​​