దిల్లీ హైకోర్టులో దినకరన్​కు ఊరట

అన్నాడీఎంకే మాజీ నేత టీటీవీ దినకరన్​కు దిల్లీ హైకోర్టులో ఊరట లభించింది. 'రెండాకుల గుర్తు కేసు' విచారణ నిలిపివేయాలని మధ్యంతర ఉత్తర్వులు జారీ చేసింది. గుర్తు కోసం ఎన్నికల కమిషన్​కు లంచం ఇవ్వజూపారనేది ఆయనపై ఆరోపణ.

అన్నాడీఎంకే మాజీ నేత టీటీవీ దినకరన్​కు దిల్లీ హైకోర్టులో ఊరట లభించింది. రెండాకుల గుర్తుపై ట్రయల్​ కోర్టు విచారణను నిలిపేయాలని దిల్లీ హైకోర్టు స్టే విధించింది. అన్నాడీఎంకే పార్టీ గుర్తును దక్కించుకునేందుకుఎన్నికల సంఘం అధికారులకు భారీగా లంచం ఇవ్వజూపారని దినకరన్​పై అభియోగాలున్నాయి.

ఈ వ్యవహారంలో దినకరన్​పై కేసులు పెట్టాలని పలువురు అన్నాడీఎంకే నేతలు కోర్టును ఆశ్రయించారు. ఐపీసీ సెక్షన్​120బీ (మోసపూరిత కుట్ర), 201 (సాక్ష్యాలను ధ్వంసం చేయడం)తోపాటు అవినీతి నిరోధక చట్టంలోని సెక్షన్ 8 కింద ట్రయల్ కోర్టు కేసు నమోదు చేసింది.

ట్రయల్​ కోర్టు నిర్ణయాన్ని సవాల్​ చేస్తూ దినకరన్​ 2018 డిసెంబరు 4న సీనియర్​ న్యాయవాది అరవింద్​ నిగమ్​, నవీన్​ మల్హోత్రాల ద్వారా దిల్లీ హైకోర్టులో పిటిషన్​ దాఖలు చేశారు.

ఈ నేపథ్యంలో ట్రయల్​ కోర్టు విచారణను నిలిపేస్తూ దిల్లీ హైకోర్టు మధ్యంతర ఉత్తర్వుల జారీ చేసింది. తదుపరి విచారణ మార్చి 20కి వాయిదా వేసింది.