పోలీసులను పరుగెత్తించి కొట్టిన గ్రామస్థులు.. ఎందుకో తెలుసా?

బంగాల్​లో బాలికలపై లైంగిక వేధింపులకు ఒడిగట్టిన ఓ పోలీసు అధికారికి చుక్కలు చూపించారు స్థానికులు. పోలీసు అధికారి మోటారు సైకిల్​కు నిప్పంటించారు. పారిపోతున్న అతడ్ని పట్టుకుని దేహశుద్ధి చేశారు. అనంతరం ఓ గదిలో పెట్టి తాళం వేశారు.

బంగాల్​ ఉత్తర ​24-పరగణాలో బాలికలను లైంగికంగా వేధించాడని ఓ పోలీసు అధికారికి దేహశుద్ధి చేశారు గ్రామస్థులు.

హారువాలో 9వ తరగతి చదువుతున్న ఇద్దరు బాలికలు శుక్రవారం సాయంత్రంపాఠశాలలో నిర్వహించిన సాంస్కృతిక కార్యక్రమాల్లో పాల్గొన్నారు. అదే సమయంలో అసిస్టెంట్​​ సబ్ ఇన్​స్పెక్టర్​(ఏఎస్​ఐ) అయిన జహంగీర్​ హుసేన్ అక్కడే విధులు నిర్వహిస్తున్నాడు​​. బాలికలను ఎవరూ లేని ఓ తరగతి గదిలోకి తీసుకెళ్లి అసభ్యంగా ప్రవర్తించాడు. ఇదే విషయాన్ని బాలికలిద్దరూ తమ తల్లిదండ్రులకు చెప్పారు.

విషయం తెలుసుకుని ఆగ్రహించిన కుటుంబసభ్యులు.. గ్రామస్థుల సాయంతో పోలీసులపై దాడి చేశారు. ఒక్కసారిగా పెద్ద సంఖ్యలో వస్తున్న జనాన్ని చూసి హుసేన్​కు భయమేసింది. వెంటనే అక్కడినుంచి తప్పించుకునేందుకు ప్రయత్నించాడు. అది కుదరనందున ఓ తరగతి గదిలోకి వెళ్లి దాక్కోవాలని చూశాడు. అయితే అప్పటికే పాఠశాల ఆవరణలోకి వచ్చిన గ్రామస్థులు హుసేన్​కు దేహశుద్ధి చేశారు. అనంతరం తరగతి గదిలో పెట్టి తాళం వేశారు.

సమాచారం అందుకున్న ఉన్నతాధికారుల బృందం ఘటనా స్థలానికి చేరుకుని.. హుసేన్​ను కాపాడింది. జహంగీర్​పై కేసు నమోదు చేసి దర్యాప్తు చేపట్టారు.

ఇదీ చదవండి: బస్తీమే సవాల్: కాలం మారింది..సెల్​ఫోన్​తో ఇస్మార్ట్ ప్రచారం..