మైనస్ డిగ్రీల్లో కూరగాయలు పండించటంపై డీఆర్​డీఓ దృష్టి

లద్దాఖ్​లో సైనికులు శీతాకాలంలో పడే ఇబ్బందులు తొలగించేందుకు డీఆర్​డీఓ కృషి చేస్తోంది. ఇందులో భాగంగా మైనస్ డిగ్రీల్లో కూరగాయలు పండించే సాంకేతికపై ప్రయోగాలు చేపట్టింది. చలికాలంలోనూ భారత సైనికులకు తాజా కూరగాయలు అందించేందుకు ప్రయత్నిస్తోంది.

తూర్పు లద్దాఖ్​లో వాస్తవాధీన రేఖ వెంబడి అత్యంత కఠిన పరిస్థితులు ఉంటాయి. శీతాకాలంలో ఈ ఇబ్బందులు మరింత తీవ్రమవుతాయి. అయితే సరిహద్దు ఉద్రిక్తతల నేపథ్యంలో ఇక్కడ గస్తీ కీలకం కానుంది. అయితే, సైనికులకు ఈ సమయంలో ఆహారం అందించటం ఎంతో క్లిష్టమైన ప్రక్రియ.

చలికాలంలో ఈ ప్రాంతంలో మైనస్​ డిగ్రీల ఉష్ణోగ్రతలు నమోదవుతాయి. ఈ పరిస్థితుల్లో అక్కడ ఆహార ఉత్పత్తి కష్టమైన పని. దీన్ని అధిగమించేందుకు రక్షణ పరిశోధన, అభివృద్ధి సంస్థ (డీఆర్​డీఓ) కృషి చేస్తోంది. ఈ కఠిన పరిస్థితుల్లో భారత సైన్యం కోసం కూరగాయలు పండించేందుకు ప్రయోగాలు చేస్తోంది.

కూరగాయల సాగు

వివిధ సాంకేతికతలతో..

డీఆర్​డీఓ అధీనంలోని ఎత్తయిన ప్రాంతాల పరిశోధనల రక్షణ సంస్థ(డీఐహెచ్​ఏఆర్​) ఈ ప్రయోగాలను నిర్వహిస్తోంది. ఇందుకు పాసివ్​ గ్రీన్​హౌస్​, జీరో ఎనర్జీ ఆధారిత నిల్వ, మైక్రోగ్రీన్​ వంటి సాంకేతికతలను ఉపయోగిస్తున్నట్లు తెలిపారు సంస్థ డైరెక్టర్​ ఓం ప్రకాశ్ చౌరాసియా.

"వేసవిలో లభించినట్లుగానే శీతకాలంలోనూ సైనికులకు తాజా కూరగాయలు అందించే విషయంపై దృష్టి పెట్టాం. ఈ సాంకేతికలతో క్యాబేజీ, కాలీఫ్లవర్​, టమాటలు పండించే అవకాశం ఉంది. జనవరిలో -25 డిగ్రీల ఉష్ణోగ్రతలోనూ వీటిని పండించవచ్చు. అంతేకాదు, జీరో ఎనర్జీతో కూరగాయలను సుమారు 4,5 నెలలపాటు నిల్వ చేయవచ్చు."

- డాక్టర్ ఓం ప్రకాశ్ చౌరాసియా

కఠిన పరిస్థితుల్లో మొక్కల సాగు

సోలో మూలిక..

అంతేకాకుండా, ఆక్సిజన్​ స్థాయి తక్కువుండే హిమాలయాల్లో సైనికుల పోషకాహారంపైనా దృష్టి సారించినట్లు ప్రకాశ్ తెలిపారు. లద్ధాఖ్​లో లభించే 'సోలో' అనే మొక్క సంజీవని అంటూ ప్రధాని నరేంద్రమోదీ ప్రస్తావించారు. ఈ మొక్కలకు పర్వత ప్రాంతాల్లో వచ్చే పలు రుగ్మతలను నయం చేయటంతో పాటు జ్ఞాపక శక్తి మెరుగుపరుస్తుందని చౌరాసియా వెల్లడించారు. వీటిని కూడా పెంచేందుకు ప్రణాళికలు రచిస్తున్నట్లు తెలిపారు.

కూరగాయలు, ఔషధ మొక్కలు

ఇదీ చూడండి:భారత్- చైనా సరిహద్దుల్లో రెండు మూపురాల ఒంటెలు!