కరోనా కేసుల రెట్టింపు సమయం ప్రస్తుతం 10.9 రోజుల నుంచి 12.2 రోజులకు మెరుగుపడిందని కేంద్ర ఆరోగ్యశాఖ మంత్రి హర్షవర్ధన్ మంగళవారం తెలిపారు. విదేశాల్లో ఉన్న వలసదారులు, ప్రవాస భారతీయుల తిరిగి స్వదేశానికి తిరిగి రానున్న దృష్ట్యా మెరుగైన నిఘా వ్యవస్థ, కాంటాక్ట్ ట్రేసింగ్ అవసరాన్ని గుర్తు చేస్తూ ఈ వ్యాఖ్యలు చేశారు.
'ఆరోగ్య సేతు తప్పని సరి చేయండి..'
దేశంలో ప్రస్తుతం మరణాల రేటు 3.2 శాతం ఉండగా.. వైరస్ నుంచి కోలుకుంటున్న వారి సంఖ్య కూడా క్రమంగా పెరుగుతోంది. రికవరీ రేటు 31.74శాతంగా ఉందని హర్షవర్ధన్ పేర్కొన్నారు.
జమ్ముకశ్మీర్, లద్దాఖ్, ఉత్తరాఖండ్, హిమాచల్ప్రదేశ్ రాష్ట్రాల్లో కరోనా నియంత్రణకు చేపడుతున్న చర్యలను కేంద్ర ఆరోగ్యశాఖ సహాయ మంత్రి అశ్వనీ కుమార్‌ చౌబేతో కలిసి సమీక్షించారు హర్షవర్ధన్. విదేశాల నుంచి తిరిగి వచ్చిన వారందరిపై నిఘా పెట్టి, పరీక్షలు నిర్వహించడం, కాంటాక్ట్ ట్రేసింగ్, సకాలంలో చికిత్స అందించడంపై దృష్టి కేంద్రీకరించాలని రాష్ట్రాలను కోరారు. అందరికీ ఆరోగ్య సేతు మొబైల్ యాప్ను తప్పనిసరి చేయాలని సూచించారు.
ఇతర విషయాలు..
- ఇప్పటివరకు నమోదైన యాక్టివ్ కేసుల్లో ఐసీయూలో ఉంటున్న రోగులు 2.37 శాతం.
- వెంటిలేటర్లపై 0.41శాతం మంది ఉండగా.. ఆక్సిజన్ సాయంతో చికిత్స తీసుకుంటున్న వారు 1.82 శాతం.
- 347 ప్రభుత్వ ప్రయోగశాలలు, 137 ప్రైవేటు ల్యాబ్లతో కరోనా పరీక్షలు.. రోజులో లక్ష వరకు చేసే సామర్ధ్యం పెరిగింది.
- కరోనా నిర్ధరణ కోసం ఇప్పటి వరకు 17,62,840 పరీక్షలు జరిగాయి.
- ఒక్క సోమవారమే 86,191 నమూనాలను పరీక్షించారు.
'ప్రారంభ దశలోనే వైరస్ను గుర్తించొచ్చు..'
వైరస్పై పోరాటానికి కేంద్ర, రాష్ట్ర ప్రభుత్వాలు సమర్థవంతంగా చేస్తున్న కృషిని చూస్తుంటే.. ఎలాంటి సమస్యనైనా ఎదుర్కొనేందుకు దేశం సిద్ధంగా ఉందనే భరోసా లభించిందని హర్షవర్ధన్ ధీమా వ్యక్తం చేశారు.
ఉత్తరాఖండ్లో శ్వాసకోస సంబంధిత సమస్యలు, ఫ్లూ లక్షణాలపై నిఘా వ్యవస్థ, కాంటాక్ట్ ట్రేసింగ్ కోసం చేసిన కృషిని హర్షవర్ధన్ ప్రశంసించారు. ఈ విధంగా చేయడం వల్ల ప్రారంభ దశలోనే వైరస్ సోకిన వ్యక్తిని గుర్తించి.. మహమ్మారిని అరికట్టవచ్చని అన్నారు. లద్దాఖ్లో పొగాకు వినియోగం అధికంగా ఉన్న నేపథ్యంలో.. ప్రభుత్వం విధించిన నిబంధనల మేరకు బహిరంగ ప్రదేశాల్లో ఉమ్మివేయకూడదని సూచించారు.
దేశవ్యాప్తంగా ఇప్పటివరకు 2,293 మంది వైరస్కు బలైనట్లు ఆరోగ్య మంత్రిత్వశాఖ పేర్కొంది. 70వేలకు పైగా మహమ్మారి బారిన పడ్డారు.
