మోదీ, సోనియా, రాహుల్​ల పెట్టుబడులు తెలుసా?

నరేంద్రమోదీ, సోనియా గాంధీ, రాహుల్​గాంధీ వ్యక్తిగతంగా ఎక్కడ పెట్టుబడులు పెడతారో ఆలోచించారా? బంగారం, ద్రవ్య, స్థిరాస్తి లాంటి వాటిలో దేన్ని ఎంచుకున్నారు? ఎలాంటి పొదుపు ఖాతా, షేర్లు, మ్యూచువల్​ ఫండ్లు ఉపయోగిస్తారు? తెలుసుకుందాం రండి..

వ్యక్తిగత పెట్టుబడులు... ఈ విషయంలో ఒక్కొక్కరు ఒక్కో విధంగా నడుచుకుంటారు. ఎవరి అభిప్రాయం వారిది. దేశ ప్రధాని నరేంద్రమోదీ, కాంగ్రెస్​ అధ్యక్షుడు రాహుల్​గాంధీ, అగ్రనేత సోనియా గాంధీల పెట్టుబడులు ఎలా ఉంటాయన్నది ఆసక్తికర అంశం.

ఎన్నికల సంఘానికి సమర్పించిన ప్రమాణ పత్రాల్లో ఈ నేతలు పెట్టుబడులు, ఇతర ఆస్తుల వివరాలు పొందుపరిచారు. వీటి ఆధారంగా ఈటీవీ భారత్​ అందిస్తున్న ప్రత్యేక కథనం మీ కోసం...

నరేంద్రమోదీ..

• ప్రకటించిన ఆస్తుల విలువ : 2.51 కోట్లు

మోదీ ఎల్​ అండ్​ టీ ఇన్​ప్రాస్ట్రక్చర్​ ట్యాక్స్​ సేవింగ్​ బాండ్​లో రూ.20 వేలు పెట్టుబడి పెట్టారు. జాతీయ పొదుపు పథకం, పోస్టల్​ సేవింగ్స్​, బీమాల్లో రూ. 7.62 లక్షలు మదుపు చేశారు.

మోదీ పేరు మీద రూ. 1.14 లక్షలు విలువ చేసే 45 గ్రాముల బంగారు ఉంగరాలు ఉన్నాయి. ఎస్​బీఐ ఖాతాలో రూ. 85,145 టీడీఎస్​(ట్యాక్స్​ డిడక్షన్​ ఎట్​ సోర్స్​)గా ప్రకటించారు. ప్రధానమంత్రి కార్యాలయంలో టీడీఎస్​ను రూ.1.41 లక్షలుగా తెలిపారు.

మోదీకి 3,531 చదరపు అడుగుల ఇళ్లు ఉంది. ప్రస్తుత మార్కెట్​ విలువ రూ.1.10 కోట్లు. ఇందుకు సంబంధించి అద్దె, విద్యుత్​, బిల్లు, టెలిఫోన్​ లాంటివి ప్రభుత్వానికి బాకీ లేరు.

సోనియా గాంధీ...

• ప్రకటించిన ఆస్తుల విలువ : రూ.11.82 కోట్లు

సోనియా గాంధీ మంచి పెట్టుబడిదారు అని చెప్పుకోవచ్చు. మ్యూచువల్​ ఫండ్లు, బాండ్లు, డిబెంచర్లు, షేర్లలో రూ. 2.45 కోట్లు పెట్టారు. ఇవి హెచ్​డీఎఫ్​సీ, కొటక్​, మోతిలాల్​ ఓస్వాల్​, రిలయన్స్​, హడ్కో, పవర్​ ఫినాన్స్​ కార్పొరేషన్​ తదితర వాటిలో ఉన్నాయి.

వీటితో పాటు రూ. 72.25 లక్షలు జాతీయ పొదుపు పథకం, పోస్టల్​ సేవింగ్స్​, బీమా తదితరాల్లో పెట్టారు. రూ. 59.97 లక్షల విలువైన అభరణాలు, ఇతర వస్తువులు ఉన్నాయి.

దిల్లీలో దేరామండి, సుల్తాన్​పూర్​ గ్రామాల్లో 3.28 ఎకరాల భూమి ఉంది. ప్రస్తుత మార్కెట్​ విలువ రూ. 7.29 కోట్లు. మొత్తం రూ. 16.60 లక్షలు బ్యాంకు ఖాతాల్లో ఉన్నాయి. రూ.60 వేలు మాత్రమే ద్రవ్య రూపంలో ఉన్నాయి.

రాహుల్​ గాంధీ...

⦁ ప్రకటించిన ఆస్తుల విలువ : రూ. 15.88 కోట్లు

తల్లి సోనియా గాంధీలా రాహుల్​ కూడా విభిన్న రకాల ఫండ్లలో పెట్టుబడులు పెట్టారు.

2017-08 సంవత్సరానికి దాఖలు చేసిన ఐటీ రిటర్నులలో రూ. 1.12 కోట్ల ఆదాయం ప్రకటించారు. నగదు రూపంలో రూ.40 వేలు ఉండగా... బ్యాంకు ఖాతాల్లో రూ.17.93 లక్షలు ఉన్నాయి.

రాహుల్​ గాంధీ రూ.5.20 కోట్లు మ్యూచువల్​ ఫండ్లలో పెట్టారు. ఆదిత్య బిర్లా సన్​లైఫ్​, డీఎస్​పీ స్మాల్​ క్యాప్​, ఫ్రాంక్లిన్​ ఇండియన్​ ఈక్విటీ, ఐడీఎఫ్​సీ మల్టీ క్యాప్​, ఎల్​ అండ్​ టీ ఈక్విటీ, మోతిలాల్​ ఓస్వాల్​ మల్టీ క్యాప్​, ఐసీఐసీఐ ప్రుడెన్షియల్​ లాంటి ఫండ్లు ఈయన పోర్ట్​ఫోలియోలో ఉన్నాయి.

జాతీయ పొదుపు పథకం, పోస్టల్​ సేవింగ్స్​, బీమా పాలసీలు తదితరాల్లో రూ.39.89 లక్షలు ఉండగా... బంగారం తదితర విలువైన వస్తువులపై రూ.2.91 లక్షలు పెట్టుబడులు పెట్టారు.

రాహుల్​కు తన సోదరి ప్రియాంకతో కలిసి రూ.1.33 కోట్లు మార్కెట్​ విలువున్న భూమి ఉంది. గురుగ్రామ్​లో రూ.8.76 కోట్లు విలువైన 5,838 చదరపు అడుగుల కార్యాలయం ఉంది.

నితిన్​ గడ్కరీ....

• ప్రకటించిన ఆస్తుల విలువ : రూ. 25.12 కోట్లు

గడ్కరీపై మొత్తం ముగ్గురు కుటుంబసభ్యులు ఆధారపడి ఉన్నారు. హిందూ ఉమ్మడి కుటుంబం(హిందూ అన్​డివైడెడ్​ ఫ్యామిలీ-హెచ్​యూఎఫ్​)కి ఈయనే కర్త.

2017-18కి దాఖలు చేసిన ఐటీ రిటర్నులలో రూ.6.40 లక్షల ఆదాయం ప్రకటించారు. అదే కాలానికి ఈయన భార్య ఆదాయం రూ. 39.43 లక్షలుగా తెలిపారు. హెచ్​యూఎఫ్​ కర్త హోదాలో 2017-18 సంవత్సరానికి రూ. 8.75 లక్షల ఆదాయం ప్రకటించారు.

వేరు వేరు బ్యాంకులలో రూ.8.99 లక్షల పొదుపు ఉంది. డెట్​, షేర్లు, మ్యూచువల్​ ఫండ్లలో మొత్తం రూ.3.55 లక్షల పెట్టుబడులు ఉన్నాయి.

గడ్కరీకి పుర్తి పవర్​ అండ్​ షుగర్​ లిమిటెడ్​ అనే కంపెనీ ఉంది. కోఆపరేటీవ్​ హౌసింగ్​ సొసైటీలో షేర్లు ఉన్నాయి.

రుణాలు, అడ్వాన్స్​లు, ఇతర పెట్టుబడులు, ఇతర ఆస్తులలో రూ. 14.81 లక్షలు ఉన్నట్లు ప్రకటించారు. మొత్తం రూ.20.10 లక్షల విలువ చేసే వాహనాలు ఉన్నాయి. నగలు లాంటి విలువైన వస్తువుల్లో రూ.21.83లక్షల పెట్టుబడులు ఉన్నాయి.