'విరిగిన ఆ బౌల్ని అతికించు.. నా హృదయం కూడా అతుక్కుంటుంది' అంటుంది కథనాయిక. దాన్ని తీసుకెళ్లి చక్కగా అతికించి తెస్తాడు హీరో. అందంగా తీర్చిదిద్దిన ఆ పాత్రని చూపిస్తూ.. 'అతికించిన తర్వాత ఎంత అందంగా తయారయిందో చూశావా.. ప్రేమ బంధం కూడా రెండోసారి కలిస్తే అంతే అందంగా ఉంటుంది' అంటాడు హీరో. ఈ సీన్ ఓ ప్రముఖ తెలుగు సినిమా లోనిది. ఇలాంటి ఘటనే మధ్యప్రదేశ్లోని భోపాల్లో జరిగింది. ఇద్దరి మధ్య గొడవలతో విడాకులు తీసుకుని వేరైపోయిన ఓ జంట.. మరోసారి ఒక్కటయ్యింది. తప్పులను దిద్దుకుని కలిసి నడుద్దామంటూ రెండున్నర ఏళ్ల తర్వాత రెండో ఇన్నింగ్స్ ప్రారంభించింది.
ఇదీ జరిగింది..
భోపాల్ నగరం.. కోలార్ ప్రాంతానికి చెందిన ఓ జంట రెండున్నర ఏళ్ల క్రితం.. ఎంత కౌన్సిలింగ్ ఇచ్చినప్పటికీ కలిసి ఉండలేమంటూ విడిపోయింది. నాడు వారికి సంవత్సరం ఎనిమిది నెలల చిన్నారి కూడా ఉంది. అయితే ప్రస్తుత లాక్డౌన్ కాలంలో తన జీవితాన్ని సమీక్షించుకున్నాడు భర్త. భార్య, బిడ్డలు లేకుండా జీవితం దుర్భరమైపోయిందని భావించాడు. వెంటనే నాడు కలిసి ఉండాలని ఎంతో కౌన్సిలింగ్ ఇచ్చిన అధికారికి ఫోన్ చేసి.. విషయం చెప్పారు. ఆ కౌన్సిలర్ విడిపోయిన దంపతులిద్దరూ వీడియో కాల్ ద్వారా మాట్లాడుకునే ఏర్పాటు చేశాడు. అయితే పునర్వివాహానికి మొదట నిరాకరించింది ఆ యువతి. కానీ ఇరుగుపొరుగు వారి సలహాతో రెండోసారి వివాహానికి సిద్ధమయింది. పెళ్లి బంధంతో ఇరువురు మరోసారి ఒక్కటయ్యారు.