మిడతల దండును ఎలా ఎదుర్కోవాలో పైలట్లు, ఇంజనీర్లకు విమానయాన నియంత్రణ సంస్థ డీజీసీఏ శుక్రవారం మార్గదర్శకాలు జారీ చేసింది. క్లిష్టమైన ల్యాండింగ్, టేకాఫ్ దశలో ఈ మిడతల దండుతో ముప్పు వాటిల్లే ప్రమాదం ఉందని హెచ్చరించింది.
"సాధారణంగా మిడతలు తక్కువ ఎత్తులోనే ఎగురుతాయి. అందువల్ల టేకాఫ్, ల్యాండింగ్ సమయంలో విమానాలకు ప్రమాదం ఉంటుంది. మిడత పరిమాణం చాలా చిన్నది. పెద్ద సంఖ్యలో వచ్చే మిడతల ద్వారా విండ్షీల్డ్పై ప్రభావం అధికంగా ఉంటుంది. ఫలితంగా పైలట్ ముందు దృష్టిని ప్రభావితం చేస్తుంది. ల్యాండింగ్, టేకాఫ్ దశల్లో ఎదురయ్యే సమస్య ఇదే. పెద్ద సంఖ్యలో మిడతలు ఇంజిన్ ఇన్లెట్, ఎయిర్ కండిషనింగ్ ప్యాక్ ఇన్లెట్లోకి ప్రవేశించే అవకాశం ఉంది."
- విమానయాన నియంత్రణ సంస్థ
డీజీసీఏ మార్గదర్శకాలు..
- పిటాట్, స్టాటిక్ వంటి భాగాలను పాక్షికంగా లేదా పూర్తిగా మూసి ఉంచాలి. విమానాల్లో పిటాట్ నాళం గాలి వేగాన్ని కొలిచేందుకు ఉపయోగిస్తారు. వీటిని మూసి ఉంచటం ద్వారా గాలి, ఎత్తు సూచీల్లో తప్పులు చూపించే ప్రమాదం ఉంటుంది. ఈ విషయంలో జాగ్రత్తగా వ్యవహరించాలి.
- విండ్ షీల్డ్పై ఉండే వైపర్లను ఉపయోగిస్తే ప్రమాదం మరింత పెరిగే అవకాశం ఉంది. ఈ విషయాన్ని పైలట్ గుర్తుంచుకోవాలి.
- మిడతలు భారీ సంఖ్యలో ఉంటే అసలేమీ కనిపించకపోవచ్చు. అందువల్ల ఆ ప్రాంతంలో ఎప్పటికప్పుడు మిడతల ఉనికిపై అప్రమత్తంగా ఉండాలి.
- విమానాశ్రయ పరిసరాల్లో మిడతలు ఉన్నట్లు గుర్తిస్తే.. ఎయిర్ ట్రాఫిక్ కంట్రోలర్లు వెంటనే వచ్చే విమానాలతో పాటు వెళ్లేవాటికి సమాచారం అందివ్వాలి.
- మిడతలు పగటి పూటే దండెత్తుండటం వల్ల పైలట్ ఎప్పుడూ వాటిని గమనిస్తూ ఉండాలి. ఎక్కడైనా మిడతల దండు ఉనికిని గుర్తిస్తే పైలట్లు వెంటనే సమాచారం అందించాలి.
- అన్నింటికన్నా ముఖ్యంగా మిడతలను గుర్తిస్తే విమానాన్ని వెంటనే నిలువరించాలి. వీలైనంత వరకు ప్రయాణాన్ని వాయిదా వేయటం మంచిది.
- మిడతల గుంపులో నుంచి విమానం వెళ్లినట్లయితే ల్యాండింగ్ తర్వాత సిబ్బంది పూర్తిస్థాయిలో తనిఖీలు చేపట్టాలి. వచ్చే ప్రయాణానికి ఎలాంటి ఇబ్బందులు తలెత్తకుండా చర్యలు తీసుకోవాలి.
భారత్లో 21 ఏళ్ల తర్వాత ఎడారి మిడతలు దండెత్తాయి. రాజస్థాన్లో మొదలై పంజాబ్, గుజరాత్, మహారాష్ట్ర, మధ్యప్రదేశ్కు విస్తరించాయి.
