మహారాష్ట్రలో 'ఆపరేషన్ కమలం' ప్రక్రియ కొనసాగడం లేదని ఆ రాష్ట్ర మాజీ ముఖ్యమంత్రి దేవేంద్ర ఫడణవిస్ అన్నారు. అంతర్గత కలహాలతో మహా వికాస్‌ అఘాడి ప్రభుత్వం దానంతట అదే కూలిపోతుందని జోస్యం చెప్పారు. కేంద్ర హోంమంత్రి అమిత్‌షాతో సమావేశం ముగిశాక ఆయన ఇలా వ్యాఖ్యానించారు.
రాష్ట్రంలో చక్కెర పరిశ్రమకు ఆర్థిక సాయం అందించాలని కోరేందుకే అమిత్‌షాతో సమావేశం అయ్యానని ఫడణవిస్ తెలిపారు. రాజకీయ అంశాలేవీ మాట్లాడలేదని పేర్కొన్నారు. రాష్ట్రంలో కరోనా వైరస్‌ను కట్టడి చేసేందుకు ప్రధాని నరేంద్రమోదీ జోక్యం చేసుకోవాలని కోరానని వెల్లడించారు. రాష్ట్ర ప్రభుత్వాన్ని అస్థిరపరిచే ఆసక్తి తమకు లేదన్నారు. ఇది వైరస్‌పై పోరాడాల్సిన సమయమని వెల్లడించారు.