ముంబయికి మరో ముప్పు- తీవ్ర తుపానుగా అల్పపీడనం!

కరోనాతో అతలాకుతలం అవుతున్న ముంబయిని తుపాను రూపంలో మరో విపత్తు ముంచెత్తనుంది. అరేబియా సముద్రంలో ఏర్పడిన అల్పపీడనం మరింత బలపడి తీవ్ర తుపానుగా మారనుందని వాతావరణ శాఖ వెల్లడించింది. మహారాష్ట్ర, దక్షిణ గుజరాత్​ తీరాల్లో భారీ వర్షాలు కురుస్తాయని తెలిపింది.

అరేబియా సముద్రంలో ఏర్పడిన అల్పపీడనం తీవ్ర తుపానుగా మారే అవకాశం ఉందని భారత వాతావరణ శాఖ తెలిపింది. ఈ తుపాను ఉత్తర మహారాష్ట్ర, దక్షిణ గుజరాత్​ తీరాలను జూన్ 3న తాకే అవకాశం ఉందని వెల్లడించింది.

"అల్పపీడనం మరింత బలపడి సోమవారం సాయంత్రానికి మూడు, నాలుగు దశల్లో తుపానుగా మారే అవకాశం ఉంది. జూన్ 2 నాటికి తీవ్ర తుపానుగా మారుతుంది. మంగళవారం ఉదయం ఉత్తరం వైపు ప్రయాణించి అనంతరం ఉత్తర- ఈశాన్య దిశకు మారుతుంది. బుధవారం రాత్రి ఉత్తర మహారాష్ట్ర, దక్షిణ గుజరాత్​ తీరాలను తుపాను తాకుతుంది."

- భారత వాతావరణ శాఖ (ఐఎండీ)

తీరాన్ని తాకే సమయానికి గాలి వేగం 105-110 కిలోమీటర్లు ఉంటుందని తెలిపింది ఐఎండీ. ముంబయి నగరంపై తుపాను ప్రభావం అధికంగా ఉంటుందని స్పష్టం చేసింది. దక్షిణ గుజరాత్, మహారాష్ట్ర తీర ప్రాంతాల్లో భారీ వానలు కురిసే అవకాశం ఉందని పేర్కొంది.

ఇదీ చూడండి:ఉత్తర్​ప్రదేశ్​లో వరుణుడి బీభత్సం.. 43 మంది మృతి