ఫేస్బుక్ ఇండియా ఉపాధ్యక్షుడు, మేనేజింగ్ డైరెక్టర్(ఎండీ) అజిత్ మోహన్పై అక్టోబర్ 15 వరకు ఎలాంటి చర్యలు తీసుకోవద్దని దిల్లీ అసెంబ్లీ కమిటీని సుప్రీంకోర్టు ఆదేశించింది.
దిల్లీ అల్లర్ల సందర్భంగా విద్వేష ప్రసంగాలు చేసిన వారిపై ఫేస్బుక్ ఉదాసీన వైఖరి అవలంబించిందన్న ఆరోపణలపై అసెంబ్లీ శాంతి భద్రతల కమిటీ విచారణ జరుపుతోంది. ఈ విషయంపై తమ ముందు హాజరు కావాలని అజిత్ మోహన్కు ఇదివరకే రెండు సార్లు నోటీసులు ఇచ్చింది.
ఈ నేపథ్యంలో సుప్రీంను ఆశ్రయించిన మోహన్.. తనకు ఇచ్చిన నోటీసులను సవాలు చేస్తూ పిటిషన్ దాఖలు చేశారు. దీనిపై జస్టిస్ సంజయ్ కిషన్ కౌల్, జస్టిస్ అనిరుద్ధ బోస్, జస్టిస్ కృష్ణ మురారీతో కూడిన ధర్మాసనం విచారణ చేపట్టింది. మోహన్ పిటిషన్పై అభిప్రాయం చెప్పాలని కేంద్ర హోం, ఐటీ, న్యాయ మంత్రిత్వ శాఖలకు నోటీసులు జారీ చేసింది సుప్రీం. లోక్సభ, రాజ్యసభ కార్యదర్శులు, దిల్లీ పోలీసులకు కూడా తాఖీదులు ఇచ్చింది.
ఇదీ చదవండి-ఫేస్బుక్కు మళ్లీ నోటీసులు.. విచారణకు రావాల్సిందే!
